Xhaka, sërish në qendër të vëmendjes në Zvicër

Televizioni zviceran ka shkruar se Xhaka e di se çka po bën. Edhe media të tjera, si “Bluewin”, kanë shkruar se përplasja Xhaka – Yakin, është “shenjë e mirë”

Zvicra e Australia luajtën ndeshje të zbehtë në motin e nxehtë të San Diegos, të shtunën. Por pas barazimit 1:1, kapiteni i Zvicrës, Granit Xhaka, ndez zjarrin.

“Ju nuk mund të luanë në këtë mënyrë, përndryshe ktheheni në shtëpi pas tri ndeshjesh. Duhet të zgjohemi. Brazimi 1:1 ishte ftesë për zgjimin e secilit”, ka thënë Xhaka për televizionin zviceran, SRF.

“Kishte gjëra që nuk ishin të mira këtë javë dhe kjo ndikon në lojë. Nëse punoni fort, kjo shfaqet në fushë. Ky nuk ishte rast këtë javë”, ka vazhduar Xhaka.

Nuk është hera e parë që mesfushori dhe legjenda e futbollit të Zvicrës është kritik për punën që bëhet në përfaqësuese. Këtë e ka bërë herë pas here në karrierën impresive. Bëri bujë sidomos në vitin 2023 pas një ndeshjeje me Kosovën, kur kritikoi edhe kushtet e stërvitjes së “helvetikëve”. Më pas pati ndryshim pozitiv te Zvicra.

Trajneri Murat Yakin është përgjigjur pas deklaratës së fundit të Xhakës. “Me Granitin, gjërat asnjëherë nuk janë të mërzitshme. Ai gjithnjë dëshiron të fitojë dhe insiston për perfeksion”.

Yakini e sheh miqësoren si shumë më pozitive. Ai ka thënë se ishte test i suksesshëm me dy apo tri rënie të koncentrimit. “Po ashtu na kanë munguar sulmuesit kryesorë si Ruben Vargas apo Breeel Embolo. Jam i sigurt se do të jemi gati”, ka vazhduar Yakin.

Yakin ka paralajmëruar një takim privat me Xhakën pas kritikave të kapitenit për përgatitjet. Selektori i Zvicrës ka thënë se lojtarët kanë nisur përgatitjet në kohë të ndryshme për shkak të obligimeve që i kanë për Botëror. Gjatë deklaratës për televizionin zviceran, Xhaka ka theksuar se “ka mësuar që nuk mund t’i thotë të gjitha”. Por ka thënë mjaftueshëm.

“E kemi edhe një javë për të punuar me veten dhe më pas do të jemi gati. Për këtë, na duhet përkushtim maksimal”, ka thënë Xhaka.

Televizioni zviceran ka shkruar se Xhaka e di se çka po bën. Sipas SRF, Xhaka me përvojën e tij, di si të nxjerr më të mirën nga bashkëlojtarët “dhe nëse është e nevojshme, edhe me kritika publike”.

Edhe media të tjera, si “Bluewin”, kanë shkruar se përplasja Xhaka – Yakin, është “shenjë e mirë”.

---