Sommaruga: “Të mos abuzohet me mitin e Betejës së Marignanos”

„Marignano është shndërruar në mit për zviceranët. Mitet janë të rëndësishme për secilin komb por duhet pasur kujdes që të mos mbetemi të ngujuar në të kaluarën"

Të dielën, më 13 shtator është shënuar në Zvicër 500 vjetori i betejës së njohur Marignanos. Bëhet fjalë për një betejë të zhvilluar në Marignano që është në Itali, në periferi të Milanos. Ndonëse e kishin humbur, zviceranët e kishin krijuar një mit mbi këtë betejë. Pikërisht rreziku nga mitizimi ka qenë kryefjalë e fjalimit të presidentes së vendit, Simonetta Sommaruga, të mbajtur me këtë rast në Melegnano-n ialiane.

Ajo ka tërhequr vërejtjen që e kaluara të mos shfrytëzohet për qëllimet e të sotmes.

„Marignano është shndërruar në mit për zviceranët. Mitet janë të rëndësishme për secilin komb por duhet pasur kujdes që të mos mbetemi të ngujuar në të kaluarën. Fati i Zvicrës së sotme nuk është vulosur në Marignano”, ka thënë Sommaruga. Ajo pastaj ka theksuar se “për etapat kryesore të rrugës deri te Zvicra e sotme, siç janë: emancipimi i gruas, krijimi i shërbimeve sociale, ngritja e shtetit juridik etj. nuk ka mite dhe as vende përkujtimi. Këto arritje nuk janë vulosur në fusha të luftës por me argumente dhe me vota”, ka shtuar ajo.

Beteja në Marignano është zhvilluar më 13 dhe 14 shtator 1515 para portave të Milanos dhe ka përfudnuar me një humbje të rëndë për zviceranët. Rreth 12.000 luftëtarë të konfederatës Helvetike kishin humbur jetën në luftë me ushtrinë e mbretit të Francës dhe Republikës së Venedikut.