Serbia nuk i lejon shqiptarët të votojnë në Medvegjë

Rreth 2000 shqiptarë janë bllokuar në pikëkalimin e Mutivodës, duke mos u lejuar që të shkojnë për të votuar në zgjedhjet e parakohshme lokale. Shqiptarët janë revoltuar

Në kundërpërgjigje me vendimin e këshilltarëve shqiptarë të Bujanocit dhe Preshevës për të themelimin e Asociacionit të Komunave Shqiptare në Serbi, ka reaguar Qeveria e Serbisë, e cila ka bllokuar hyrjen në komunën e Medvegjës, të rreth 2000 shqiptarëve që po shkon për të votuar në zgjedhjet e parakohshme lokale.

Qytetarët e komunës së Medvegjës, janë bllokuar në pikëkalimin në Mutivodës, që ndanë Kosovën me Serbinë.  Arsyetimi i autoriteteve serbe, sipas “Zërit”, është se nuk po u funksionon sistemi policisë kufitare të Serbisë, mirëpo arsyeja kryesore është moslejimi i pjesëmarrjes masive të shqiptarëve në zgjedhjet e së cilës.

Aktivistët shqiptarë në Medvegjë u kërkojnë nga shqiptarët që janë bllokuar në kufi që mos të zmbrapsen nga qëllimet e tyre për të votuar, pavarësisht presioneve të ndryshme që u vijnë nga shteti serb. Mësohet se qytetarët e Medvegjës e kanë bllokuar pikëkalimin kufitar.

Disa qytetarë kanë kërkuar nga ministrja për Dialog, Edita Tahiri dhe ministri i Punëve të Brendshme, Skënder Hyseni, që të bëjnë trysni tek autoritetet serbe në mënyrë që ata të lejohen të shkojnë për të votuar. Po ashtu kanë kërkuar nga përfaqësuesit shqiptar që ti tërheqin dy listat shqiptare nga zgjedhjet.

Ndryshe, nuk është kjo hera e parë që Serbia u pengon shqiptarët të marrin pjesë në zgjedhjet lokale të Komunave me shumicë shqiptare në Luginë të Preshevës. Në Bujanoc, madje Serbia po dislokon kolonë serbë nga Kosova, në anën tjetër shqiptarëve po u marre të drejtën e vendbanimit, duke i bërë pa të drejtë vote.