Gjeneva autorizon një protestë “të kufizuar” kundër G7

Autoritetet përcaktojnë itinerarin e marshit të protestës më 14 qershor

Autoritetet në Gjenevë kanë miratuar zhvillimin e një proteste të kufizuar kundër samitit të G7, i cili do të mbahet nga 15 deri më 17 qershor në Évian të Francës, rreth 45 kilometra larg qytetit zviceran, transmeton albinfo.ch.

Sipas organizatorëve, aktivistët kundër G7 kanë planifikuar një marsh proteste që do të zhvillohet të dielën, më 14 qershor.

Autoritetet e Gjenevës kanë bërë të ditur edhe itinerarin e protestës së miratuar. Marshimi do të nisë në orën 16:00 nga Parku Mon Repos, duke vazhduar drejt Quai du Mont-Blanc, më pas përgjatë Rue du Mont-Blanc deri në Rue de la Servette dhe Rue Hoffmann.

Nga aty, protesta do të vazhdojë përgjatë Avenue Giuseppe-Motta deri në Place des Nations, ndërsa kthimi është planifikuar përmes Avenue de France drejt Parkut Mon Repos.

Autoritetet kanë theksuar se protesta do të zhvillohet në kushte të përcaktuara dhe të kontrolluara, me qëllim garantimin e sigurisë publike dhe mbarëvajtjes së saj. /Albinfo.ch

---