Izolimi çon në më shumë mosbesim, thotë një studim zviceran

Hulumtimi u realizua tek një grup prej 12 personash që kaluan dhjetë muaj në stacionin kërkimor Concordia në Antarktidë

Një studim i udhëhequr nga Universiteti i Bernës ka arritur në përfundimin se izolimi afatgjatë dhe jetesa në kushte ekstreme rrisin ndjenjën e vetmisë, mosbesimin dhe konfliktet mes njerëzve. Hulumtimi u realizua tek një grup prej 12 personash që kaluan dhjetë muaj në stacionin kërkimor Concordia në Antarktidë, shkruan swissinfo.ch, transmeton albinfo.ch.

Sipas studiuesve, pjesëmarrësit raportuan rritje të konflikteve dhe mendimeve paranojake, ndërsa ndjenja e bashkëpunimit dhe performanca e ekipit ranë gradualisht gjatë misionit. Të dhënat treguan se edhe kontakti i vazhdueshëm fizik nuk solli më shumë afërsi, por në shumë raste shtoi tensionet dhe mosbesimin.

Studimi zbuloi gjithashtu se grupi nisi të ndahej sipas kombësive, duke rritur rrezikun e polarizimit social dhe konflikteve të brendshme. Ekspertët paralajmërojnë se këto rezultate janë të rëndësishme për misionet e ardhshme hapësinore, nëndetëset dhe ambientet e tjera ku njerëzit jetojnë për periudha të gjata në izolim.

Hulumtuesit theksojnë nevojën për mbështetje psikologjike dhe monitorim të vazhdueshëm të marrëdhënieve sociale në mjedise të tilla ekstreme, për të shmangur përkeqësimin e gjendjes mendore dhe konfliktet brenda ekipeve.

---