Brukseli i hap rrugë Shqipërisë drejt BE-së, pritet Konferenca Ndërqeveritare më 26 maj

Shqipëria merr sinjal pozitiv nga Brukseli, hapet rruga për Konferencën Ndërqeveritare me BE-në

Shqipëria ka shënuar një hap të rëndësishëm në procesin e integrimit evropian, pasi raporti IBAR (Interim Benchmark Assessment Report) ka kaluar pa kundërshtime në nivel teknik të Bashkimit Evropian dhe pritet të miratohet në COREPER, përcjell albinfo.ch.

Sipas burimeve nga Brukseli, drafti i qëndrimit të përbashkët të BE-së është aprovuar në grupin COELA dhe tashmë po kalon në fazën e ambasadorëve të BE-së, para se të konfirmohet zyrtarisht mbajtja e Konferencës Ndërqeveritare më 26 maj.

IBAR është një dokument vlerësues i Komisionit Evropian që mat progresin e vendeve kandidate në përmbushjen e kritereve për hapjen e kapitujve të negociatave, ndërsa COREPER shërben si filtrimi përfundimtar politik para vendimeve të Këshillit të BE-së.

Pas këtij zhvillimi, pritet që Shqipëria të marrë dritën jeshile për mbajtjen e Konferencës Ndërqeveritare, e cila konsiderohet një hap kyç në avancimin e negociatave të anëtarësimit në BE./Albinfo.ch

---