Kryeparlamentari i Maqedonisë në Bernë: Diskutime për etikën parlamentare dhe konsensusin politik

Kryetari i Kuvendit të Maqedonisë së Veriut, Afrim Gashi, ka marrë pjesë në aktivitetet e zhvilluara në Bern në kuadër të programit “Diskutimet Malore për Etikën Parlamentare”.

Gjatë fjalës së tij, Gashi theksoi rëndësinë e gatishmërisë dhe vullnetit politik për arritjen e konsensusit rreth çështjes së etikës parlamentare, duke e cilësuar atë si thelbësore për forcimin e besimit të qytetarëve në institucionet demokratike.

Ai shprehu optimizëm se procesi i diskutimeve do të kontribuojë në reflektimin mbi vlerat demokratike, me fokus në integritetin parlamentar dhe përgjegjësinë publike, transmeton albinfo.ch.

Diskutimet mbi Kodin Etik pritet të vazhdojnë edhe në ditët në vijim. Në këtë kontekst, Gashi falënderoi partnerët ndërkombëtarë, Ambasadën e Zvicrës dhe NDI, për mbështetjen e këtij procesi.

Programi synon avancimin e standardeve të etikës parlamentare dhe forcimin e kulturës së përgjegjësisë institucionale në Kuvendin e Maqedonisë së Veriut.