Rojet Kufitare ankohen për mungesë personeli

Trupave të Rojeve Kufitare u mungojnë edhe 200 deri 300 veta për të kryer punën me cilësi, ka thënë shefi i tyre

Shtimi i fluksit të refugjatëve që po mësyjnë Zvicrën e ka ballafaquar trupën e rojeve kufitare (GWK) me mungesë të personelit.

Shefi i GWK, Jürg Noth ka thënë për gazetën “Schweiz am Sonntag” se trupave që ai drejton u mungojnë edhe 200 deri 300 veta për të kryer punën me cilësi. Pikat ku kjo mungesë vërehet më shumë janë aktualisht Tesina (jugu i vendit), Brigu dhe kufiri lindor rreth Buchs-it të Kantonit St. Gallen.

“Nuk kemi mundësi t`i realizojmë të gjitha obligimet, para së gjithash ato në fushë të doganave”, ka thënë Noth. Për këtë arsye, ka shtuar ai, “turistët kufitarë” që blejnë mallra me sasi të palejueshme në shtetet që kufizohen me Zvicrën, nuk ka më mundësi të kontrollohen.

Ndaj gjithë kësaj mungese personeli, Këshilli Federal ka reaguar duke lejuar vetëm 48 vende të reja pune për trupat e rojeve kufitare.