Nga Kosova në Parlamentin e Kanadasë, një rrëfim suksesi dhe vlerësimi

Një histori frymëzuese Vanesa Sulimani nga Kosova drejt vlerësimit në Kanada

Vanesa Sulimani, me prejardhje nga Kosova, është vlerësuar nga Parlamenti i Kanadasë si pjesë e iniciativës 25@25, një njohje që synon të nderojë histori suksesi dhe kontribute të veçanta në shoqërinë kanadeze, transmeton albinfo.ch.

Sulimani e ka cilësuar këtë vlerësim si një moment të rëndësishëm personal dhe simbolik, duke theksuar se si refugjate, ky nder përfaqëson një rrugëtim të ndërtuar mbi shpresë, qëndrueshmëri dhe sakrificë.

Ajo ka treguar se fillimet e saj në një vend të ri kanë qenë të shoqëruara me sfida të mëdha, përfshirë përshtatjen me një gjuhë dhe kulturë të re, si dhe ndërtimin e jetës nga fillimi. Megjithatë, ajo thekson se Kanadaja i ka ofruar familjes së saj siguri, mundësi dhe një komunitet ku mund të kontribuojnë dhe të zhvillohen.

Në mesazhin e saj, Sulimani falënderoi prindërit për sakrificat e bëra, duke theksuar se rrugëtimi i saj është i ndërtuar mbi vendimet dhe guximin e tyre.

Sipas saj, ky vlerësim nuk i përket vetëm asaj, por të gjithë refugjatëve që rindërtojnë jetën e tyre dhe kontribuojnë në ndërtimin e komuniteteve më të forta dhe më gjithëpërfshirëse në Kanada./Albinfo.ch

---