Kosova prezantohet me kulturë, film dhe muzikë në Hamburg

Ekspozita, dokumentar dhe muzikë: Kosova prezantohet në Hamburg

Konsullata e Republika e Kosovës në Hamburg hapi dyert për publikun në kuadër të eventit “Nata e Gjatë e Konsullatave”, një nismë e Senatit të qytetit që synon të promovojë shkëmbimin ndërkulturor dhe të forcojë bashkëjetesën mes komuniteteve të ndryshme në qytet, transmeton albinfo.ch.

Këtë vit, për të dytin vit radhazi, institucioni diplomatik mirëpriti një numër të madh vizitorësh, përfshirë përfaqësues të institucioneve vendore dhe të komuniteteve ndërkombëtare. Mes të ftuarve ishte edhe Sekretarja e Shtetit për Çështje Sociale dhe Integrim në Hamburg, Funda Gür, si dhe deputetë të Parlamentit të Hamburgut dhe qytetarë gjermanë të interesuar për kulturën dhe historinë e Kosovës.

Në kuadër të programit të këtij viti, Kosova u prezantua përmes një koncepti që vuri në pah rolin e gruas në ndërtimin dhe zhvillimin e shoqërisë, nga antikiteti deri në ditët e sotme. Ky rrëfim u soll përmes filmit dokumentar dhe elementeve të trashëgimisë historike e kulturore.

Programi përfshiu ekspozitën “Mëmëdhe” të organizuar nga Muzeu Kombëtar i Kosovës, shfaqjen e dokumentarit “Gratë e Lirisë” nga regjisori Lum Citaku, si dhe performancën artistike të bendit “Echoes of Origin”, nën udhëheqjen e mezzo-sopranos Flaka Goranci.

Po ashtu, në kuadër të eventit u prezantua edhe këndi “Made in Kosova (MIK)”, ku vizitorët patën mundësi të njihen me produkte vendore dhe të marrin pjesë në degustimin e verërave nga prodhues kosovarë.

Një mirënjohje e veçantë iu shpreh edhe drejtoreshës së Muzeut Kombëtar të Kosovës, Vjollca Aliu, për bashkëpunimin dhe mbështetjen në realizimin e ekspozitës.

Konsullata e Kosovës theksoi se mbetet e përkushtuar në avancimin e mëtejmë të marrëdhënieve me Qytetin e Lirë dhe Hanseatik të Hamburgut, duke synuar thellimin e bashkëpunimit në fusha me interes të përbashkët./Albinfo.ch

 

Photo: Jeton Bylykbashi

---