Bebe Rexha shkëlqen në tapetin e kuq të “Billboard Women in Music 2026” në Los Angeles

Këngëtarja shqiptare u dallua me paraqitje elegante në eventin prestigjioz, ndërsa po përgatitet për albumin e ri “Dirty Blonde”.

Këngëtarja shqiptare me famë ndërkombëtare, Bebe Rexha, ka qenë në qendër të vëmendjes në tapetin e kuq të eventit prestigjioz Billboard Women in Music 2026, i mbajtur më 29 prill në Hollywood Palladium në Los Angeles, transmeton albinfo.ch. 

Ngjarja, e organizuar nga Billboard, nderon gratë më me ndikim në industrinë muzikore dhe këtë vit u moderua nga Keke Palmer. Në mesin e të ftuarave dhe të vlerësuarave ishin edhe emra të njohur si Teyana Taylor, Zara Larsson, Kehlani, Tate McRae, Thalía dhe Laufey.

Në paraqitjen e saj, Rexha u dallua me një stil elegant dhe të guximshëm, duke zgjedhur një fustan të zi të ngushtë, të kombinuar me detaje pelushi në nuanca rozë-gri mbi supe. Ajo e kompletoi dukjen me çorape rrjete, taka elegante dhe aksesorë modernë, ndërsa flokët bionde në stil bob dhe grimi i theksuar i dhanë një pamje të fuqishme dhe karizmatike.

Pjesëmarrja e saj në këtë event vjen në një periudhë të rëndësishme të karrierës, pasi këngëtarja po përgatitet për publikimin e albumit të ri “Dirty Blonde”, që pritet të dalë më 12 qershor. Ndërkohë, ajo po shijon suksesin e këngës “New Religion”, në bashkëpunim me Faithless, e cila po pritet mirë nga publiku dhe po ngjitet në toplistat ndërkombëtare./Albinfo.ch 

 

---