Violinistja Alda Dizdari mahnit publikun londinez në koncertin në “St. James Piccadilly”

Së bashku me London International Concert Orchestra dhe dirigjentin Alexander Walker, ajo solli një program me vepra të Dvorak, Sibelius dhe Tchaikovsky.

Mbrëmjen e djeshme, në ambientin historik të kishës “St. James Piccadilly” në zemër të Londrës, u mbajt një koncert i nivelit të lartë nga London International Concert Orchestra (LICO), transmeton albinfo.ch.

Në qendër të këtij koncerti ishte violinistja shqiptare Alda Dizdari, e cila performoi si soliste dhe u prit me duartrokitje të shumta nga publiku i pranishëm.

Alda Dizdari, e shoqëruar nga LICO dhe nën drejtimin e dirigjentit Alexander Walker, interpretuan një program të pasur me vepra nga kompozitorët e njohur Dvorak, Sibelius dhe Tchaikovsky, duke krijuar një mbrëmje të veçantë artistike.

Ky koncert shënon rikthimin e Dizdarit në “St. James Piccadilly”, në kuadër të serisë së koncerteve në këtë vend, ndërsa ajo dhe dirigjenti Walker kanë bashkëpunuar në projekte të shumta, përfshirë edhe një incizim të publikuar në nëntor 2025 me muzikë të kompozitorit britanik Robin Holloway, realizuar me Orkestrën Kombëtare të BBC-së së Uellsit./Albinfo.ch

---