Në Lozanë hapet ekspozita “Trésors Vestimentaires”, kushtuar veshjeve tradicionale shqiptare

Më 2 maj 2026 në Universitetin e Lozanës do të prezantohet koleksioni i Flora Balaj me kostume tradicionale shqiptare, i shoqëruar edhe me valle popullore.

Më 2 maj 2026, në ambientet e Universitetit të Lozanës (UNIL), do të mbahet ekspozita “Trésors Vestimentaires”, një ngjarje kulturore e veçantë kushtuar pasurisë së veshjeve tradicionale shqiptare, transmeton albinfo.ch.

Ekspozita do të zhvillohet nga ora 13:00 deri në 18:00, në ndërtesën Géopolis, salla 1612, dhe do të sjellë para publikut një koleksion të rrallë me kostume tradicionale shqiptare nga treva të ndryshme.

Përmes kësaj ekspozite, vizitorët do të kenë mundësinë të shohin nga afër larminë, elegancën dhe identitetin kulturor shqiptar, të ruajtur ndër shekuj përmes veshjeve popullore.

Ngjarja organizohet me koleksionin e Flora Balaj, ndërsa programi do të përfshijë edhe një intermezzo me valle tradicionale shqiptare, duke i dhënë aktivitetit një atmosferë autentike.

Ky aktivitet pritet të mbledhë komunitetin shqiptar në Zvicër, studentë, studiues dhe dashamirës të kulturës, duke promovuar trashëgiminë kombëtare shqiptare në një prej universiteteve më të njohura evropiane.

Hyrja në ekspozitë është e hapur për publikun./Albinfo.ch

---