Linjat ajrore po keqpërdorin krizën e karburantit

Propozime si lejimi i bagazheve shtesë falas do ta bënin më të vështirë përballimin e kostove në rritje, thotë industria

Linjat ajrore evropiane po përdorin krizën e çmimeve të karburantit për t’i kërkuar Britanisë së Madhe dhe Brukselit të tërhiqen nga një sërë rregullash që industria i kundërshton, përfshirë planet për t’u lejuar pasagjerëve dy bagazhe dore falas në çdo fluturim.

Grupet e lobimit po u kërkojnë politikanëve të heqin dorë nga disa masa që industria i ka kundërshtuar prej vitesh, përfshirë rregullat e reja për bagazhet, pagesat mjedisore dhe ndryshimet në skemat e kompensimit të pasagjerëve, raporton Financial Times.

Ata argumentojnë se këto kërkesa tashmë i vendosin kompanitë ajrore të BE-së dhe Britanisë në disavantazh dhe duhet të tërhiqen për t’i ndihmuar të përballojnë dyfishimin e çmimeve të karburantit për avionë në javët e fundit, shkruan Monitor, transmeton albinfo.ch.

József Váradi, drejtuesi ekzekutiv i Wizz Air, tha: “Nuk e nisa unë luftën në Iran. Pse duhet t’i mbaj unë pasojat?” Ai tha se qeveritë duhet të pezullojnë rregullat që i detyrojnë linjat ajrore të paguajnë kompensim nëse mungesat e karburantit i pengojnë të fluturojnë, duke shtuar se shumë nga rregullat ndaj industrisë janë politike.

EasyJet ka thënë tashmë se do të regjistrojë humbje më të madhe nga sa pritej në muajt e pranverës. Lufthansa ka anuluar 20 mijë fluturime, duke thënë se kostot më të larta të karburantit do t’i bënin ato të paleverdishme. Edhe Virgin Atlantic tha se do ta kishte të vështirë të dilte me fitim këtë vit.

Çmimet më të larta të karburantit për avionë po godasin linjat ajrore. EasyJet ka thënë tashmë se do të ketë humbje më të madhe nga sa pritej në muajt e pranverës.

“Ne kemi kërkuar vazhdimisht kushte të barabarta loje”, tha një drejtues i lartë i një linje ajrore. “Kriza është thelluar. Këto janë disa nga masat që mund të merren, edhe përkohësisht, për të sjellë lehtësim.”

Ndër ndryshimet më të dukshme, Parlamenti Evropian po shqyrton nëse pasagjerët duhet të lejohen të marrin falas në bord një bagazh të dytë dore më të madh, krahas një çante më të vogël.

Ndërsa disa kompani, si BA, e lejojnë tashmë këtë, transportuesit me kosto të ulët argumentojnë se një rregull i tillë do t’i detyronte të rrisnin çmimet e biletave dhe do të krijonte probleme për modelin e tyre të biznesit, i cili mbështetet te kthimi i shpejtë i avionit në fluturim pas uljes.

“Ne konkurrojmë ndërkombëtarisht”, tha drejtuesi i linjës ajrore. “Nëse SHBA-ja dhe Kanadaja do të zbatonin rregulla të ngjashme për kompensimin dhe bagazhet, do të isha dakord.”

Industria kërkon gjithashtu ndryshime në rregullat për “tankering”, praktikën kur linjat ajrore furnizohen me më shumë karburant në një aeroport ku çmimi është më i ulët, për të shmangur furnizimin në aeroporte ku karburanti kushton më shtrenjtë. Sipas operatorëve, rregullat aktuale i kufizojnë kompanitë që të hyjnë në rajon me karburant më të lirë të marrë më parë, duke rritur kostot e fluturimeve.

Lufthansa ka anuluar 20 mijë fluturime, duke thënë se kostot më të larta të karburantit do t’i bënin ato të paleverdishme. “Pezullimi i përkohshëm i detyrimit kundër tankering, sa më shpejt të jetë e mundur, do të ndihmonte për të sjellë më shumë qartësi ndërsa linjat ajrore përballen me këto rrethana të reja sfiduese”, shkroi Ourania Georgoutsakou, drejtuese e grupit të industrisë Airlines 4 Europe.

“Kanë kaluar më shumë se 50 ditë që nga nisja e konfliktit dhe do të duhen javë që furnizimi të kthehet në normalitet. Na duhen përshtatje të përkohshme të rregullave të BE-së për ta përballuar këtë sfidë.”

Linjat ajrore po lobojnë gjithashtu për ndryshime që do të ulnin koston e kompensimit të pasagjerëve për fluturimet e anuluara, sipas dy personave në dijeni të diskutimeve. Ndryshimet në rregullat për slotet aeroportuale, oraret e caktuara për ngritje dhe ulje në aeroporte të ngarkuara, janë gjithashtu në listën e kërkesave të industrisë. Aktualisht, linjat ajrore duhet t’i përdorin këto slote në një përqindje minimale, përndryshe rrezikojnë t’i humbasin, edhe në periudha kur kërkesa për udhëtime është e dobët.

Qeveria britanike ka njoftuar se do t’u japë linjave ajrore mundësinë të kërkojnë përjashtim nga rregulli i sloteve “përdore ose humbe”, në rastet kur mungesa e karburantit i bën të pamundura fluturimet. Pra, në këto situata të jashtëzakonshme, kompanitë nuk do të detyrohen të kryejnë fluturime vetëm për të ruajtur slotet e tyre dhe nuk do t’i humbasin ato nëse nuk arrijnë të operojnë për shkak të kufizimeve në furnizimin me karburant.

Ajo shtoi se kjo do të thotë se linjat ajrore mund të përqendrohen te minimizimi i ndërprerjeve për pasagjerët, në vend që të ndihen nën presion për të kryer fluturime vetëm për të mbrojtur slotet.

Në Bruksel, politikëbërësit ngurrojnë të rishkruajnë legjislacionin që rregullon industrinë, por vende si Portugalia kanë ngritur shqetësime për efektin e çmimeve të larta të karburantit për avionë te turizmi.

Deri tani, zyrtarët evropianë kanë thënë se janë të gatshëm t’i japin industrisë disa lehtësi, në një sektor që mbështet më shumë se 5 milionë vende pune në rajon, por vetëm përkohësisht.

“Do të lejojmë fleksibilitet për slotet aeroportuale, anti-tankering, detyrimet e shërbimit publik dhe të drejtat e pasagjerëve”, tha javën e kaluar komisioneri për Transportin dhe Turizmin, Apostolos Tzitzikostas, duke premtuar “ndryshime të përkohshme në legjislacion” nëse situata përkeqësohet.

Megjithatë, Tzitzikostas tha se nuk do t’u kërkonte njerëzve të fluturonin më pak për shkak të krizës. “Në këtë moment nuk ka nevojë të ndërhyjmë në mënyrën si njerëzit jetojnë, punojnë apo udhëtojnë.”

---