Boksieri Bernardin Jakaj fiton titullin kampion të Evropës në kategorinë WBO në Austri

Jakaj tani renditet ndër dhjetë më të mirët në renditjen botërore të WBO

Në një sallë në Korneuburg, të mbushur me shqiptarë, boksieri shqiptar i cili jeton në Austri, Bernardin Jakaj, gjunjëzoi në ring rivalin e tij rumun, Mirel Drogan, shkruan albinfo.

Boksieri shqiptar fitoi me „KO“ në rundin e dytë shtunën në ndeshjen e tij për titullin vakant evropian të peshave super të mesme në kategorinë WBO, duke u bërë kampioni i ri evropian.

“Jam shumë i lumtur për fitoren, është një ndjenjë e mrekullueshme”, tha Jakaj në një intervistë me ORF.

Jakaj tani renditet ndër dhjetë më të mirët në renditjen botërore të WBO dhe madje mund të ketë një shans për një ndeshje për titullin botëror vitin e ardhshëm.

Ky event u organizua nga Simpa Sports udhëhequr nga ish-boksieri i njohur shqiptar në Austri, Shpëtim Shala.

---