BE nis pagesën e parë prej 61.8 milionë euro për Kosovën në kuadër të Planit për Rritje Ekonomike

Kosova përfiton parafinancim nga paketa prej 882.6 milionë eurosh, të lidhur me 111 reforma

Bashkimi Evropian ka nisur bartjen e mjeteve të parafinancimit në vlerë prej 61.8 milionë euro për Kosovën, në kuadër të Instrumentit për Reforma dhe Rritje të Planit të BE-së për Rritje Ekonomike për Ballkanin Perëndimor, përcjell albinfo.ch.

Sipas njoftimit, ky hap vjen pas ratifikimit në Kuvendin e Kosovës të marrëveshjeve të lidhura me planin dhe dorëzimit të dokumentacionit të nevojshëm nga Qeveria e Kosovës.

“Pas ratifikimit në Kuvend të Kosovës të Marrëveshjeve të lidhura me Planin e BE-së për Rritje Ekonomike dhe dorëzimit të dokumentacionit të nevojshëm nga Qeveria, Komisioni Evropian ka nisur bartjen e mjeteve të parafinancimit prej 61.8 milionë eurosh për Kosovën”, thuhet në njoftim.

Parafinancimi përbën rreth 7% të shumës totale prej 882.6 milionë eurosh, që Kosova pritet të përfitojë deri në fund të vitit 2027 në formë grantesh dhe kredish të favorshme.

Sipas BE-së, këto mjete do të mbështesin zbatimin e Agjendës së Reformave të Kosovës dhe projekte kyçe infrastrukturore të financuara përmes Kornizës së Investimeve të Ballkanit Perëndimor (WBIF).

Nga totali i parë, 28.74 milionë euro janë transferuar si kredi në buxhetin e Kosovës, ndërsa pjesa tjetër prej 33.04 milionë euro (17.73 milionë grante dhe 15.31 milionë kredi) do të kanalizohet përmes WBIF-it.

Në kuadër të Agjendës së Reformave, Kosova është zotuar për zbatimin e 111 hapave reformues në fusha të ndryshme, përfshirë sundimin e ligjit, qeverisjen, zhvillimin ekonomik, tranzicionin e gjelbër dhe digjital, si dhe kapitalin njerëzor.

Sipas afateve të përcaktuara, 13 hapa reformash duhet të përmbushen deri më 30 qershor 2026, me vlerë prej 90.8 milionë eurosh, ndërsa deri në fund të vitit janë paraparë edhe 27 hapa të tjerë me vlerë prej 165.9 milionë eurosh.

BE ka theksuar se disbursimi i fondeve do të jetë i lidhur drejtpërdrejt me zbatimin e reformave të dakorduara, duke paralajmëruar se mjetet nuk do të paguhen në rast të mos-përmbushjes së tyre brenda afateve.

Shefja në detyrë e Zyrës së BE-së në Kosovë, Eva Palatova, tha se Plani për Rritje Ekonomike ofron mundësi konkrete për përshpejtimin e reformave dhe afrimin e ekonomisë së Kosovës me tregun e BE-së.

Ndërkohë, Kryeministri i Kosovës, Albin Kurti, u shpreh se vendi është i përkushtuar në zbatimin e reformave dhe shfrytëzimin e plotë të mundësive të ofruara nga plani evropian.

BE mbetet një nga donatorët më të mëdhenj në Kosovë, ndërsa përmes këtij mekanizmi synohet përshpejtimi i reformave dhe integrimi më i afërt ekonomik i vendit me Bashkimin Evropian./Albinfo.ch

---