Kompania e shqiptarit Albon Rexhepi kontribuon në kthimin e astronautëve të Artemis 2

Keystone (AP Photo/Chris O'Meara)

Misioni Artemis II i NASA-s, i nisur më 1 prill, shënon fluturimin e parë me astronautë drejt Hënës pas mbi 50 vitesh. Një rol kyç në sigurimin e kthimit të sigurt të ekuipazhit ka pasur kompania Dewerton Inc, udhëhequr nga Albon Rexhepi, shqiptar nga Çegrani i Gostivarit.

Albon Rexhepi shpjegon rëndësinë e teknologjisë së kompanisë së tij:

“Produktet tona duhet të jenë jashtëzakonisht precize sepse kanë lidhje direkte me jetën e astronautëve. Çdo komponent që ne prodhojmë për NASA-n kalon vite testimesh dhe investimesh para se të instalohet në anijen kozmike Orion. Pjesët tona ndihmojnë në matjen dhe navigimin e anijes, duke siguruar që rruga dhe kthimi në Tokë të jenë të sakta. Astronautët pritet të kthehen pranë Oqeanit Paqësor në Kaliforni brenda pak ditësh,” tha Rexhepi, raporton alsat përcjell albinfo.ch.

Duke iu përgjigjur skepticizmit mbi vizitat në Hënë, Rexhepi thekson:

“Në Artemis II astronautët do të bëjnë vetëm një xhiro rreth Hënës, ndërsa ulja reale do të ndodhë në Artemis IV. Ky projekt përfshin shumë kompani, dhe do të ishte e pamundur që gjithë kjo të ishte një gënjeshtër.”

Ai u dha një mesazh frymëzues të gjithë të rinjve:

“Arritja e ëndrrave kërkon shumë punë dhe mësim. Pa këto, është e vështirë të arrish objektivat e tua. Por me përkushtim dhe këmbëngulje, askush nuk mund të të ndalojë.”

Aktualisht katër astronautë po testojnë sistemet e anijes Orion rreth Hënës dhe pritet të kthehen në Tokë pas një misioni prej rreth 10 ditësh, me ulje të planifikuar në Oqeanin Paqësor rreth 10–11 prillit.