Studentët e Fakultetit të Arteve përfaqësojnë Kosovën në Festivalin Ndërkombëtar të Filmit në Oberhausen

Filmi i shkurtër “Prej 6-ve në 5” është përzgjedhur në garën ndërkombëtare të edicionit të 72-të të Festivalit të Filmit të Shkurtër të Oberhausenit, ku konkurrojnë 121 filma nga 48 shtete.

Universiteti i Prishtinës ka njoftuar se studentët e Fakultetit të Arteve kanë shënuar një sukses të rëndësishëm ndërkombëtar me filmin e tyre të shkurtër “Prej 6-ve në 5”, i cili është përzgjedhur për garën ndërkombëtare në edicionin e 72-të të Festivalit Ndërkombëtar të Filmit të Shkurtër të Oberhausenit (Internationale Kurzfilmtage Oberhausen), përcjell albinfo.ch.

Sipas njoftimit, filmi është realizuar nga studentët e Departamentit të Arteve Dramatike si projekt diplome dhe trajton një ditë pune të një punëtori të sigurimit në një hotel. Ky projekt pasqyron gjithashtu rezultatet e drejtimit të ri të Kamerës dhe Montazhit të Filmit në Fakultetin e Arteve, duke dëshmuar zhvillimin dhe profesionalizmin e programeve akademike në këtë institucion.

Krijuesit e filmit, Ardian Dubova dhe Erlisë Beqiri, së bashku me ekipin akademik dhe artistik, janë pritur nga rektori i Universitetit të Prishtinës, Arben Hajrullahu, dhe prorektorët, të cilët u kanë uruar përfaqësim dinjitoz dhe sukses në këtë garë prestigjioze.

Në këtë edicion të festivalit janë përzgjedhur gjithsej 121 filma nga 48 shtete, duke e bërë përfshirjen e studentëve të Universitetit të Prishtinës një arritje të veçantë.

Filmi “Prej 6-ve në 5” përfaqëson një bashkëpunim të frytshëm ndërmjet departamenteve të Fakultetit të Arteve. Rolet kryesore janë interpretuar nga aktorët Astrit Kabashi dhe Eshref Durmishi, të cilët kanë kontribuar në këtë projekt pa kompensim material.

Universiteti i Prishtinës vlerëson se pjesëmarrja në Festivalin e Oberhausenit shënon një sukses historik për institucionin dhe mund të hapë rrugë edhe për përfshirje në garën për Çmimin Evropian të Filmit, duke theksuar potencialin e studentëve dhe cilësinë e programeve të Fakultetit të Arteve./Albinfo.ch

---