Muaji i Frankofonisë në Stokholm sjell filmin e regjisores Dea Gjinovci

Dokumentari “La Beauté de l’Âne” prezantohet më 31 mars në Zita Folkets Bio, në një ngjarje që bashkon artin, kujtesën dhe identitetin

Në kuadër të aktiviteteve të Muajit të Frankofonisë, Ambasada e Republikës së Kosovës në Stokholm, në bashkëpunim me Ambasadën e Zvicrës, organizon shfaqjen e filmit dokumentar “La Beauté de l’Âne”, me regji të autores kosovaro-zvicerane Dea Gjinovci, transmeton albinfo.ch.

Ngjarja do të mbahet më 31 mars 2026, duke filluar nga ora 18:00, në kinemanë Zita Folkets Bio në Stokholm.

Filmi paraqet një rrëfim intim dhe emocional, duke ndjekur udhëtimin e një vajze që synon të rilidhet me rrënjët familjare dhe vendlindjen e babait të saj. Pas më shumë se gjashtë dekadash në mërgim, Asllani rikthehet së bashku me vajzën e tij, Dean, në Makermal – fshatin në Kosovë ku ai ka kaluar fëmijërinë.

Përmes këtij rikthimi, ata përpiqen të ringjallin kujtimet e së kaluarës, duke bashkëpunuar me banorët lokalë për të rindërtuar fragmente të një bote të zhdukur nga lufta. Dokumentari ofron një reflektim të thellë mbi kujtesën, identitetin dhe lidhjen ndërbreznore, duke ndërthurur elemente të dokumentarit klasik me nuanca të realizmit magjik.

Kjo shfaqje është pjesë e angazhimeve kulturore që synojnë promovimin e artit dhe dialogut ndërkulturor, duke sjellë para publikut histori që tejkalojnë kufijtë dhe kohën.

Publiku është i mirëpritur të marrë pjesë në këtë ngjarje kulturore unike./Albinfo.ch

---