27 vjet nga fjalimi i Bill Clinton për ndërhyrjen e NATO në Kosovë

Fjalimi historik i presidentit amerikan më 24 mars 1999 shpjegoi arsyet e ndërhyrjes ushtarake kundër forcave serbe

Një moment kyç në historinë moderne të Kosovës dhe ndërhyrjes ndërkombëtare.

Sot shënohet 27-vjetori i nisjes së ndërhyrjes ajrore të NATO kundër objektivave ushtarake dhe policore serbe në ish-Yugoslavia, një moment vendimtar në zhvillimet që çuan drejt përfundimit të luftës në Kosovë, përcjell albinfo.ch.

Më 24 mars 1999, Aleanca Veri-Atlantike filloi fushatën e bombardimeve me qëllim ndalimin e dhunës dhe krimeve që po kryheshin ndaj popullit të Kosovës, ndërsa ndërhyrja u konsiderua e domosdoshme për të parandaluar përshkallëzimin e mëtejshëm të konfliktit.

Në të njëjtën ditë, presidenti i atëhershëm i Shteteve të Bashkuara të Amerikës, Bill Clinton, iu drejtua qytetarëve amerikanë dhe opinionit botëror, duke argumentuar nevojën për ndërhyrje ushtarake.

“Sot forcat tona iu bashkuan NATO-s kundër forcave serbe që janë përgjegjëse për brutalitetin në Kosovë. Po veprojmë për t’i mbrojtur mijëra njerëz të pafajshëm në Kosovë nga ofensiva ushtarake, po veprojmë për ta parandaluar një luftë më të gjerë”, deklaroi ai në fjalimin e tij.

Ai theksoi gjithashtu se përpjekjet për zgjidhje paqësore kishin dështuar, pavarësisht gatishmërisë së palës kosovare për marrëveshje.

“Për vite me radhë kosovarët ishin munduar paqësisht që të rifitonin të drejtat e tyre. Kur Slobodan Milošević dërgoi trupat për t’i shtypur, situata u përshkallëzua. Ne propozuam një marrëveshje paqeje që liderët kosovarë e nënshkruan, por pala serbe refuzoi edhe ta shqyrtojë”, kishte theksuar Bill Clinton.

Fjalimi i tij mbetet një nga momentet më të rëndësishme politike dhe historike, që shpjegon vendimin për ndërhyrjen ndërkombëtare dhe rolin e NATO në ndalimin e dhunës në Kosovë.

---