Lëndohet Leon Avdullahu, mungon ndaj Sllovakisë

Mesfushori i Hoffenheimit pëson lëndim muskulor dhe mbetet jashtë për disa javë, duke humbur ndeshjen vendimtare të Kosovës në plejofin për Botërorin 2026

Trajneri i Hoffenheimit, Christian Ilzer, ka konfirmuar në konferencën për shtyp të së enjtes se mesfushori Leon Avdullahu ka pësuar një lëndim muskulor, që do ta mbajë larg fushave për disa javë, përcjell albinfo.ch.

Si pasojë e këtij dëmtimi, Avdullahu nuk do të jetë në dispozicion të Kombëtares së Kosovës për ndeshjen ndaj Sllovakisë, e vlefshme për gjysmëfinalen e plejofit kualifikues për Kupën e Botës 2026. Kjo përballje do të zhvillohet më 26 mars në Bratislavë.

“Fatkeqësisht duhet të njoftojmë mungesën e një lojtari kyç. Leon Avdullahu nuk do të jetë i disponueshëm për ne për disa javë,” u shpreh Ilzer.

Megjithatë, trajneri i Hoffenheimit la të kuptohet se lojtari pritet të rikthehet para përfundimit të sezonit në Bundesligë, duke qenë se kanë mbetur edhe tetë ndeshje për t’u zhvilluar.

“Supozoj se ai do të jetë përsëri i gatshëm për lojë brenda këtij sezoni,” shtoi ai.

Ndërkohë, për të mbuluar mungesën e Avdullahut, një nga opsionet që po shqyrtohet është zhvendosja e Albian Hajdarit nga qendra e mbrojtjes në pozicionin e tij në mesfushë./Albinfo.ch

---