Pajisja e re zvicerane mund të parashikojë lindjet e parakohshme

Keystone

Një studiuese zvicerane po zhvillon një pajisje matëse që mund të ndihmojë në parashikimin e lindjeve të parakohshme, duke u dhënë mjekëve mundësinë të ndërhyjnë më herët dhe të shmangin komplikimet për foshnjat.

Çdo vit në botë rreth 15 milionë foshnja lindin para kohe. Në Zvicër, rreth 6–7% e lindjeve ndodhin para javës së 37-të të shtatzënisë, gjë që shpesh sjell vështirësi serioze për foshnjat dhe familjet e tyre, pasi organet e tyre nuk janë plotësisht të zhvilluara. Foshnjat e lindura para kohe mund të përballen me probleme të frymëmarrjes ose hemorragji cerebrale, transmeton albinfo.ch.

Biomekanistja Sabrina Badir ka zhvilluar një pajisje që mat ngurtësinë e qafës së mitrës, e cila konsiderohet një tregues i rrezikut për lindje të parakohshme. Studimet kanë treguar se gratë me një qafë mitre më fleksibile kanë më shumë gjasa të lindin para kohe.

Deri më tani, kjo karakteristikë vlerësohej vetëm me palpim, ndërsa pajisja e re synon ta masë në mënyrë të standardizuar dhe më të saktë. Ajo është zhvilluar gjatë doktoraturës së Badir në ETH Zurich dhe më pas është themeluar startup-i Pregnolia për ta çuar projektin drejt përdorimit klinik.

Aktualisht pajisja përdoret në studime, kryesisht gjatë pranimit të pacienteve në spital për të dalluar kontraksionet e rreme nga ato që paralajmërojnë lindjen. Synimi i studiueses është që në të ardhmen ajo të përdoret që në javët e hershme të shtatzënisë, duke identifikuar rrezikun që nga java e 20-të.

Startup-i ka siguruar deri tani 15 milionë franga investime, përfshirë 2 milionë euro nga Bashkimi Evropian. Studiuesit shpresojnë se kjo teknologji do të ndihmojë në kuptimin më të mirë të shkaqeve të lindjeve të parakohshme dhe në zhvillimin e trajtimeve më efektive për t’i parandaluar ato.