Çmimi i naftës në Kosovë arrin deri në 1.60 euro për litër

Derivatet po shtrenjtohen gradualisht, me vlerë që luhatet nga 1.39 deri në 1.60 euro për litër.

Pas një periudhe të trazuar dhe luhatjesh në tregjet globale të energjisë, situata në tregun e derivateve në Kosovë po tregon shenja përmirësimi, megjithëse çmimet mbeten të larta për konsumatorët, përcjell albinfo.ch.

Ditën e djeshme, berza e naftës u mbyll me një rritje prej vetëm 15 dollarësh, duke treguar një stabilizim të lehtë pas valës së luhatjeve që kanë ndikuar në çmimet botërore të naftës si pasojë e situatës në Lindjen e Mesme.

Kështu ka bërë të ditur Fadil Berjani kryetari i Shoqatës së Naftëtarëve të Kosovës.“Sot, në Kosovë çmimet e derivateve vazhdojnë të jenë: dizelli prej 1.44€ deri në 1.60€ për litër, ndërsa benzina shkon nga 1.27€ deri në 1.39€ për litër”, tha Berjani. Nga Ministria e Industrisë, Ndërmarrësisë, Tregtisë dhe Inovacionit bëhet e ditur se institucionet po monitorojnë tregun e derivateve për të parandaluar çdo praktikë të padrejtë tregtare dhe për të mbrojtur konsumatorët. Sipas tyre, Inspektorati Qendror i Mbikëqyrjes së Tregut do të ndërmarrë masa ndëshkuese në rast se konstatohet shkelje e ligjit.

Kjo situatë lidhet ngushtë me zhvillimet e fundit në Lindjen e Mesme, rajon ky kyç për furnizimin global me naftë.

Konfliktet dhe tensionet politike në këtë pjesë të botës kanë shkaktuar pasiguri në prodhimin dhe transportin e naftës, duke ndikuar drejtpërdrejt në luhatjet e çmimeve në tregjet ndërkombëtare./telegrafi

---