Xhaka i lumtur me arritjen e synimit të parë të Sunderland, BBC me vlerësim interesant

Kapiteni i Sunderlandit thekson se skuadra tashmë synon më shumë pas arritjes së 40 pikëve, ndërsa BBC vlerëson ndikimin e tij në përmirësimin e lojës së ekipit

Kapiteni i Sunderland AFC, Granit Xhaka, është shprehur i kënaqur pasi skuadra e tij ka arritur objektivin kryesor të sezonit në Premier League, transmeton albinfo.ch.

Sunderlandi e siguroi fitoren 1:0 në udhëtim ndaj Leeds United, duke arritur kështu në kuotën e 40 pikëve pas 29 xhirove të elitës angleze. Ky ishte objektivi i vendosur nga klubi në fillim të edicionit, pasi kjo shifër zakonisht konsiderohet e mjaftueshme për të siguruar mbijetesën në ligë.

Xhaka u aktivizua në minutën e 56-të të ndeshjes, duke vazhduar rikthimin gradual pas një lëndimi që e kishte mbajtur jashtë fushës për pesë ndeshje.

“Ne kemi folur në fillim të edicionit, synimi ynë ishte 40 pikë. Kemi bërë 40 pikë dhe tani duam më shumë pasi uria është e madhe”, ka deklaruar Xhaka për TNT Sports pas ndeshjes.

Ai ka theksuar se skuadra duhet të mbetet modeste dhe të vazhdojë me të njëjtën qasje edhe në ndeshjet e mbetura.

“Ne duhet të qëndrojmë modest. E dimë prej nga jemi. Synimi ishte 40 pikë. Kur e arrin synimin e parë dëshiron më shumë. Uria është prezente. I marrim ndeshjet një nga një dhe të shohim ku do të arrijmë”, ka shtuar ai.

Sunderlandi është përballur me mungesa të rëndësishme në skuadër, por mesfushori me përvojë ka vlerësuar kontributin e lojtarëve që kanë marrë më shumë hapësirë në këtë periudhë.

“Për disa lojtarë nuk ishte e lehtë që nuk kanë luajtur. Por na duhen të gjithë. Nuk mund të kesh vetëm 11 lojtarë. Luke O’Nien është një shembull i rëndësishëm për këta lojtarë. Ai e meriton gjithë respektin. Është legjendë e këtij klubi. Por të gjithë lojtarët shfaqën karakter dhe kjo na duhet”, është shprehur Xhaka.

Me 40 pikë të grumbulluara, Sunderlandi ndodhet në mesin e tabelës së Premier League, ndërsa deri në përfundim të sezonit kanë mbetur edhe nëntë xhiro.

Ndërkohë, mediumi britanik BBC ka theksuar ndikimin e madh të Xhakës në lojën e skuadrës. Sipas këtij mediumi, nuk ishte rastësi që Sunderlandi u përmirësua dukshëm pas hyrjes së mesfushorit në fushë.

BBC vlerëson se përvoja dhe lidershipi i 33-vjeçarit kanë pasur ndikim të rëndësishëm në ekip, duke e cilësuar atë si transferimin me ndikimin më të madh te Sunderlandi gjatë këtij sezoni./Albinfo.ch

---