Swiss, me shtim të numrit të pasagjerëve gjatë korrikut

Kompania Ajrore e Zvicrës Swiss gjatë korrikut, muaj i pushimeve verore ka shënuar një rritje të madhe të numrit të pasagjerëve në krahasim me muajin qershor. Bëhet fjalë për 3.9 për qind më shumë ose për shifra absolute prej 1.61 milion vetave që kanë shfrytëzuar shërbimet e Swiss-it gjatë korrikut. Rritje më e madhe është regjistruar në fluturimet interkontinentale (plus 5.6%).

Ndërsa në fluturimet brenda Evropës rritja ka qenë plus 3.5%, thuhet në një komunikatë për medie të publikuar sot nga Swiss.

Numri i fluturimeve po ashtu është rritur për 3% duke mbërritur shifrën prej 13.270 fluturimeve.

Ndërkohë, koncerni i madh ajror Lufthansa, pjesë e të cilit është edhe Swiss ka pasur gjatë korrikut një shtim prej 4.6% të numrit të udhëtarëve duke arritur në shifrën 10.99 milionë gjatë korrikut. Nga ana tjetër, pjesëtarja austriake e Lufthansa-s, Austrian Airlines (AUA) ka shënuar rritjen e parë që nga gushti i vitit 2014, rritje kjo prej 3%.