Medikamenti i parë për Alzheimer-in i autorizuar në Zvicër

Autoriteti zviceran i barnave, Swissmedic, ka autorizuar për herë të parë një medikament që mund të ngadalësojë përparimin e sëmundjes Alzheimer. Barnimi, i quajtur Donanemab dhe zhvilluar nga kompania Eli Lilly me emrin tregtar Kisunla, synon pacientët në fazat e hershme të sëmundjes dhe ka për qëllim të vonojë rënien njohëse, transmeton albinfo.ch.

Si funksionon dhe rreziqet:

Donanemab është një antitrup që redukton depozitat e proteinave në tru. Megjithatë, trajtimi ka edhe rreziqe të mundshme, si ënjtje apo gjakderdhje në tru, dhe kërkon monitorim të kujdesshëm.

Swissmedic ka vlerësuar se përfitimet e substancës aktive janë më të mëdha se efektet e mundshme anësore. Në një njoftim të përbashkët për shtyp me Swiss Memory Clinics, organizata Alzheimer Switzerland ka mirëpritur këtë autorizim.

Kostoja dhe mbulimi nga sigurimet shëndetësore:

Akoma nuk është e qartë nëse barnat do të mbulohen nga kompanitë e sigurimeve shëndetësore në Zvicër.

Ky zhvillim hap një shteg të ri në trajtimin e Alzheimer-it, duke ofruar shpresë për pacientët dhe familjet e tyre.