Shëndeti mendor në Zvicër u godit më pak nga Covid-i se në vendet e tjera, sipas një studimi

@unsplash

Një studim i Universitetit të Bazelit tregon se pandemia e Covid-19 ka pasur një ndikim më të lehtë mbi shëndetin mendor të zviceranëve krahasuar me shumë vende të tjera.

Për studimin, pak më shumë se 4,000 persona që jetojnë në Zvicër plotësuan vullnetarisht një pyetësor gjatë pandemisë. Ata dhanë informacion mbi mirëqenien e tyre, ndërsa 3,400 persona gjithashtu folën për gjendjen e tyre mendore ndërsa lajmet për Covid-19 dominonin dhe ndërprisnin rutinat e tyre të përditshme, transmeton albinfo.ch.

I njëjti pyetësor u përdor edhe në vende të tjera. Në Zvicër, si në pjesën tjetër të botës, pandemia ndikoi në mirëqenien e njerëzve dhe rriti nivelet e stresit. Por, në krahasim ndërkombëtar, barrën psikologjike ishte më pak e rëndë, si dhe rënia e ndjenjës së mirëqenies.

Mirëqenia dhe besimi në sistemin shëndetësor

Sipas Christian Huber, autorit kryesor të studimit, disa faktorë mund të shpjegojnë këtë “përjashtim zviceran”. Para pandemisë, niveli i mirëqenies ishte tashmë më i lartë në Zvicër, ndërsa masat për të kufizuar përhapjen e virusit ishin më pak të rrepta se në shumë vende të tjera.

Siguria se njerëzit kanë akses në kujdes shëndetësor cilësor dhe një sistem social të fortë ndihmoi gjithashtu në lehtësimin e stresit psikologjik të shkaktuar nga pandemia. Edhe shkalla e vdekshmërisë mund të ketë luajtur një rol. Stresi i shkaktuar nga Covid-19 ishte më i lartë në Afrikën e Jugut, Meksikë, Bjellorusi dhe Kazakistan.

Dallime sipas rajoneve

Të dhënat e mbledhura tregojnë dallime mes rajoneve të Zvicrës. Banorët e Ticinos, rajonit të Liqenit të Gjenevës dhe veriperëndimit të vendit vuajtën më shumë gjatë pandemisë se sa ata të Rrafshit Zviceran dhe Zvicrës lindore.

Christian Huber shpjegon se kjo mund të lidhet me faktin që masat kundër pandemisë nuk ishin të njëjta në të gjitha kantonet. Po ashtu, njerëzit në zonat urbane mund të jenë ndikuar më shumë nga kufizimi i kontakteve sociale dhe anulimi i ngjarjeve kulturore krahasuar me ata që jetonin në zona më pak të populluara. Kufizimet përkalimi kufitar gjatë pandemisë mund të kenë ndikuar gjithashtu tek morali.

Megjithëse studimi u bazua në përgjigje vullnetare dhe nuk është përfaqësues për të gjithë popullsinë, rezultatet ofrojnë një pasqyrë të rëndësishme mbi efektet psikologjike të pandemisë në Zvicër, thotë Christian Huber.