Bastisje në Deutsche Bank, hetime për dyshime të pastrimit të parave

Autoritetet gjermane nisin hetime në Deutsche Bank për pastrim parash

Zyra e Prokurorit Publik në Frankfurt ka njoftuar se janë duke u zhvilluar bastisje në Deutsche Bank, pas dyshimeve për pastrim parash. Nën hetim raportohet se janë disa drejtues dhe punonjës të këtij institucioni të madh financiar, përcjell albinfo.de.

Autoritetet gjermane po kontrollojnë ndërtesat që i përkasin bankës më të madhe të Gjermanisë në Frankfurt dhe Berlin, me qëllim sigurimin e provave shtesë. Bastisjet po zhvillohen vetëm një ditë para se kompania e listuar në indeksin DAX të publikojë rezultatet e saj financiare për vitin 2025.

Sipas mediave gjermane, hetimi lidhet me transaksione të mëparshme me kompani të huaja, të cilat gjithashtu dyshohen për përfshirje në aktivitete të pastrimit të parave.

Ndërkohë, Shoqata Gjermane e Gjyqtarëve vlerëson se në Gjermani pastrohen rreth 100 miliardë euro çdo vit, duke e bërë këtë fenomen një nga sfidat kryesore për sistemin financiar dhe organet e drejtësisë në vend./Albinfo.de

---