Korriku 2015, muaj i temperaturave rekorde në Zvicër

korriku 2015 në veri të vendit ka qenë për 4.5 gradë më i ngrohtë se mesatarja e viteve 1961-1990, ndërsa në jug kjo epërsi ka qenë madje 5 gradë celsius

Keystone

Korriku i vitit 2015 po del të jetë muaj rekord sa i përket temperaturave të larta dhe disa vlerave në këtë drejtim. Kështu, në disa regjione, para së gjithash në jug dhe në perëndim të vendit, korriku i sivjetmë ka qenë muaji më i ngrohtë prej më shumë se 150 vitesh apo prejse maten temperaturat në Zvicër.

Kështu sipas SRF Meteo, korriku 2015 në veri të vendit ka qenë për 4.5 gradë më i ngrohtë se mesatarja e viteve 1961-1990, ndërsa në jug kjo epërsi ka qenë madje 5 gradë celsius.

Në shumë vende të Kantonit të Tesinës gjatë korrikut çdo ditë e korrikut ka qenë ditë vere, siç konsiderohen ditët  me temperatura mbi 25 gradë. Ndërsa në Sitten të Valisit janë regjistruar 15 ditë me vapë “në bllok”.

Në Gjenevë, fjala vjen është shënuar temperatura 39.7 gradë celsius që është më e larta e regjistruar ndonjëherë në zonën veriore mbi Alpe.

Temperaturat më të larta prej fillimit të matjes, janë regjistruar edhe në disa lokalitete si Sitten, Nyon, Davoz, Arosa dhe Bernë.

Sipas njoftimit të Meteosuisse krahas temperaturave të larta gjatë këtij korriku ka pasur edhe thatësi të madhe , para së gjithash në Kantonin Freiburg.