Osmani paralajmëron njohje të reja për Kosovën

Foto: Vjosa Osmani

Presidentja e Republikës së Kosovës, Vjosa Osmani, ka bërë të ditur se vendi ka hyrë në një fazë të re dinamike në procesin e sigurimit të njohjeve ndërkombëtare, duke paralajmëruar se gjatë pjesës së parë të vitit 2026 priten zhvillime pozitive në këtë drejtim.

Ajo theksoi se Kosova po i afrohet gjithnjë e më shumë mbështetjes së dy të tretave të shteteve anëtare të Kombeve të Bashkuara, një prag i rëndësishëm në konsolidimin e subjektivitetit ndërkombëtar të vendit.

Osmani sqaroi se, ndonëse janë intensifikuar kontaktet me shtete që ende nuk e kanë njohur Kosovën, emrat e tyre nuk do të bëhen publikë për të mos rrezikuar procesin.

Sipas saj, gjatë këtij viti Kosova ka siguruar katër njohje të reja, si rezultat i një angazhimi të vazhdueshëm diplomatik, ndërsa aktualisht shumë shtete janë pranë marrjes së vendimeve për njohje.

Presidentja u bëri thirrje edhe institucioneve dhe akterëve të tjerë që të shmangin publikimin e këtyre kontakteve, pasi një veprim i tillë, sipas saj, shpeshherë shfrytëzohet nga Serbia për të ushtruar presion dhe për të penguar këtë proces.

Në këtë kuadër, Bahamas është bërë së fundmi shteti i 121-të që e ka njohur Republikën e Kosovës si shtet të pavarur dhe sovran.