VV prin bindshëm në rezultatet preliminare të zgjedhjeve të parakohshme në Kosovë

Komisioni Qendror i Zgjedhjeve (KQZ) ka publikuar rezultatet preliminare të zgjedhjeve të parakohshme parlamentare të mbajtura sot në Kosovë, ku Lëvizja Vetëvendoske po prin bindshëm ndaj partive të tjera.

Sipas të dhënave të përditësuara më 28 dhjetor 2025, ora 20:39, janë përpunuar 469,898 vota, që përbëjnë 23,50% të totalit prej 1,999,204 votash. Ndërkohë, janë procesuar 1,428 vendvotime nga gjithsej 2,557, apo 55,85%.

Në këtë fazë të numërimit, Lëvizja Vetëvendosje renditet e para me 49,67% të votave, ose 226,354 vota, duke krijuar një diferencë të thellë krahasuar me partitë e tjera dhe duke u pozicionuar qartë si fituese e deritanishme e zgjedhjeve.

Në vendin e dytë renditet Partia Demokratike e Kosovës (PDK) me 20,02% apo 91,217 vota, e ndjekur nga Lidhja Demokratike e Kosovës (LDK) me 14,12% ose 64,359 vota.

Rezultate më të ulëta kanë shënuar:

AAK – Aleanca për Ardhmërinë e Kosovës: 6,85% (31,206 vota)

Srpska Lista: 3,33% (15,186 vota)

NISMA Socialdemokrate: 1,49% (6,795 vota)

Nga KQZ bëhet e ditur se bëhet fjalë për rezultate preliminare, të cilat mund të ndryshojnë me vazhdimin e procesit të numërimit të votave nga vendvotimet e mbetura, si dhe më vonë me numërimin e votave me kusht, atyre me postë dhe votave nga diaspora.