Sindi Arifi, jo vetëm e bukur, ajo bën edhe vepra të mira në Zvicër

Finalistja e “Miss Zvicra 2015” është angazhuar për t’ iu dalë në ndihmë personave të prekur nga sëmundja epidemike e lëkurës bullosa, apo në gjermanisht “Schmetterlingskrankheit”, njofton albinfo.ch.

Kandidatja me prejardhje shqiptare, Sindi Arifi, më 7 nëntor 2015 pretendon të zgjidhet femra më e bukur e Zvicrës. Por, ajo gjithashtu angazhohet për të bërë edhe vepra bamirësie. “Unë dëshiroj t’ i vetëdijesoj njerëzit rreth epidemisë së sëmundjes bullosa”, thotë Arifi për gazetën zvicerane “Blick”.

Arsyeja për këtë është Imanoli, vëllai i të dashurit të Sindit, Alvaro Spanier. Ky djalosh vuan që nga lindja nga bullosa, një sëmundje e pashërueshme, e njohur në popull si “sëmundja flutur”.

Lëkura e të prekurve është aq e ndjeshme sa krahët e një fluture. Dy deri në tre prej 100 mijë personave vuajnë nga kjo sëmundje.
Rreth kësaj sëmundje bukuroshja shqiptare me pasaportë zvicerane shpjegon: “Është një jetë e vështirë, e cila vazhdimisht të mban me shumë dhimbje”, shprehet Arifi.

Por Sindi, e cila vitin e kaluar ishte shpallur edhe “Miss Zvicra Frankofone”, është shumë e befasuar me shpirtin luftarak që e ka “kunati” i saj, Imanoli, transmeton albinfo.ch.

“Unë e admiroj Imanolin për shpirtin e tij luftarak. Që nga koha kur e njoh, nuk mbaj mend ndonjë ditë kur ai ishte me humor të keq apo ndonjëherë që është ankuar”, thotë ajo dhe pastaj shton: “Unë nuk mund të jetoja me këtë sëmundje”, përfundon Sindi Arifi