Temperatura rekorde në Zvicër, alarm nga rreziku i zjarreve

Keystone

Zvicra po kalon një verë e temperatura shumë të larta, që i afrohet verës që njihet si rekorde sa u përket temperaturave, asaj të vitit 2003. Ka më shumë se dy javë që temperaturat rrallë zbresin nën 30 gradë dhe kjo ka bërë që shumë kantone të përshtatin masat e mbrojtjes kundër zjarrit.

Pas tetë kantoneve që kanë ngritur shkallë e gatishmërisë gjegjësisht ndalimin e rreptë të ndezjes së zjarreve në natyrë, këtë së fundi e ka bërë edhe kantoni Jura.

Bazuar në rrezikun nga përhapja e zjarrit, që vjen si pasojë e thatësisë aktuale, autoritetet e këtij kantoni kanë ndaluar ndezjen e zjarreve në pyje dhe në vendet afër pyjeve. Konkretisht është ndaluar zjarri për të bërë grill, pastaj ndezja e fishekzjarrëve etj. Ndërsa përjashtimet janë të mundshme vetëm me lejen e policisë.

Ndalime të ngjashme deri tash kanë hyrë në fuqi edhe në kantonet: Graubünden, Neuchatel, Solothurn, Vaud, Ticino, Valis dhe dy Bazelët. 12 kantone tjera deri më tash janë mjaftuar me masa paralajmëruese për kujdes nga zjarri.