Studim i OECD: Fëmijët e prindërve migrantë në Zvicër po hasin vështirësi në shkollë për shkak të gjuhës

Fëmijët e huaj po mbeten prapa në shkollë për shkak të barrierave gjuhësore

Një raport i ri i OECD-së ka ngritur alarmin për hendekun në rritje midis fëmijëve me prindër zviceranë dhe atyre me prejardhje migrimi, lidhur me aftësitë gjuhësore dhe rezultatet në mësim. Sipas studimit, Zvicra është një nga vendet evropiane ku kjo mospërputhje është më e theksuar, përcjell albinfo.ch.

Analiza, e cila përfshin më shumë se 600,000 fëmijë të lindur në Zvicër nga familje migrante, tregon se mbi 60% e tyre nuk e flasin gjuhën lokale në shtëpi. Kjo mungesë ekspozimi ndaj gjuhës së mësimdhënies po ndikon drejtpërdrejt në aftësitë e leximit dhe shkrimit, duke i vendosur ata në një disavantazh të dukshëm krahasuar me bashkëmoshatarët zviceranë.

Sipas OECD-së, vetëm tre vende – Austria, Finlanda dhe Suedia – regjistrojnë përqindje më të larta të fëmijëve migrantë që nuk e përdorin gjuhën vendase në familje.

Raporti pritet të nxisë diskutime të reja për politikat arsimore, mbështetjen gjuhësore në shkolla dhe masat që duhen ndërmarrë për të përmirësuar integrimin e hershëm të fëmijëve të komuniteteve migrante.

---