Anashkalimi i Merkelit për Shkupin, shuplakë për pushtetin

Për disa ekspertë, fakti që Merkeli viziton Tiranën, Sarajevën dhe Beogradin, por jo Shkupin, është sinjal i qartë, veçanërisht për strukturën aktuale të pushtetit.

Shuplakë diplomatike mbi pushtetin aktual në Maqedoni vlerësohet të jetë fakti që Shkupi nuk është pjesë e vizitës ballkanike të kancelares gjermane, Angela Merkel.
Mes krizës politike dhe vërejtjeve të vazhdueshme për kthimin pas të proceseve demokratike, problemeve me gjyqësorin dhe gjendjes së mediave, ky vendim i kancelares, sipas ekspertëve, është më se i qartë, por edhe shqetësues, shkruan “DW”, transmeton albinfo.ch.

„Injorimi është gjëja më e keqe që mund t’i ndodhë Maqedonisë tani, sidomos kur vjen nga anëtari më i fuqishëm i BE-së për momentin. Ky mesazh duhet të lexohet së bashku me këmbënguljen e Gjermanisë në këshillin e kaluar të BE-së që Maqedonia të hiqet nga ‘perspektiva evropiane’, thotë Malinka Ristevska Jordanova, drejtoreshë e Institutit për Politikë Evropiane .

Për disa ekspertë, fakti që Merkeli viziton Tiranën, Sarajevën dhe Beogradin, por jo Shkupin, është sinjal i qartë, veçanërisht për strukturën aktuale të pushtetit.

“Mosardhja e Merkelit është shuplakë diplomatike mbi Qeverinë aktuale të Nikolla Gruevskit dhe Ali Ahmetit”, komentoi Goran Rafajllovski, profesor universiteti dhe ish-ambasador i Maqedonisë në Berlin.