Shaqiri maskohet si plak, befason fëmijët

Kush nuk dëshiron që një herë në jetë ta këtë afër idolin e tyre? Për fëmijët e klubit SC Kriens të Luzernit, kjo ëndërr u bë realitet. Xherdan Shaqiri ishte surpriza më e madhe që u bëri fëmijëve të këtij klubi.

Përfaqësuesi i Zvicrës ishte maskuar si plak me mjekër me ngjyrë gri për t’u paraqitur si trajneri i ri i ekipit para se të luajë kundër tyre.
Fëmijët e klubit, edhe pse nuk e njihnin, dukeshin të mahnitur me veprimet e “trajnerit” të tyre të ri.

Kur Shaqa filloi të luajë me ta, ai ndërkohë hoqi maskën dhe fëmijët të gëzuar se po e shohin idhullin e tyre, vrapojnë të gjithë për ta përqafuar.

Pas ndeshjes fëmijët ishin shumë të lumtur, po aq edhe futbollisti kosovar. “Ishte një ditë argëtuese për mua”, raporton “blick.ch”, transmeton albinfo.ch.