Prodhuesit e duhanit duan të ruajnë shitjen e lirë të cigareve elektronike të vogla

Shumë kantone në Zvicër duan të ndalojnë cigaret elektronike të vogla, njëpërdorimshe; kompanitë e duhanit me seli në Zvicër po rrisin përpjekjet për ta parandaluar këtë. Disa ankesa janë duke u shqyrtuar nga Gjykata Federale kundër vendimeve të marrë në gusht nga kantonet Jura, Valais dhe Gjenevë.

Të rinjtë preferojnë cigaret elektronike të vogla me shije lici, marshmallow ose boronicë. Ky model përmban 1.7% nikotinë.

Një ankesë e re sapo është depozituar në Gjenevë nga Swiss Tobacco, raporton RTS. Multinacionaleja Philip Morris qëndron pas ankesës në Valais.

Prodhuesit e nikotinës besojnë se nuk ekziston bazë ligjore për ndalimin e cigareve elektronike të vogla, të cilën e konsiderojnë të tepruar: sipas tyre, kantonet nuk duhet të kenë këto kompetenca.

“Ata nuk kanë autoritetin për të ndaluar një produkt. Duke vepruar kështu, ata shmangin ligjin më të lartë, ligjin federal,” tha Julian Pidoux, zëdhënës i Philip Morris, për Forum.

Duke depozituar ankesën, kompania e tij kërkon “një përgjigje mbi meritën e çështjes,” shtoi ai, transmeton albinfo.ch.

Kur u pyet nëse kjo lëvizje ka të bëjë më shumë me shmangien e një humbjeje të madhe financiare, ai shmang përgjigjen: “Këto produkte luajnë një rol në qasjen e përgjithshme për reduktimin e dëmit – të cilën Philip Morris e ka ndjekur – duke ndihmuar duhanpirësit, nëse nuk e lënë duhanin, të kalojnë nga cigaret te produktet pa tym.”

Si alternativë ndaj cigareve tradicionale, në treg ka cigare elektronike, duhan të ngrohur dhe qese nikotine.

“Të lehta për t’u përdorur”

Në vend të cigareve elektronike të vogla njëpërdorimshe, prodhuesit e duhanit mund të promovojnë cigaret elektronike të rikarikueshme: “Sigurisht, mund të zgjidhni një model tjetër, por cigaret elektronike njëpërdorimshe janë të lehta për t’u përdorur, me pak pengesa. Për një duhanpirës, kjo është një kalim shumë më i thjeshtë te produktet pa tym,” thotë Julian Pidoux.

Megjithatë, me cigaret elektronike të vogla nuk bëhet vetëm fjalë për konvertimin e duhanpirësve në produkte pa duhan, por edhe për të tërhequr përdorues të rinj me doza shumë të larta nikotine. Nuk duhet harruar as problemi real i baterive të njëpërdorimshe.

Ndalimi është rruga më e lehtë

Për më tepër, pa ndalim, është e vështirë të parandalohet qasja e lehtë e të rinjve tek cigaret elektronike të vogla: “Ne e ndajmë këtë shqetësim që këto produkte mund të përfundojnë në duar të gabuara. Bëjmë gjithçka që të mos ndodhë. Por sot, nuk ka asnjë boshllëk ligjor,” thekson zëdhënësi i Philip Morris.

“Që një vit, ekziston ndalim i shitjes dhe shpërndarjes së produkteve të duhanit dhe nikotinës për të miturit. Tani mungon vetëm zbatimi i këtij ligji.” Ai shtoi se ndalimi “është rruga më e lehtë.”

Ai insiston: “Sot duhet të shohim efektet e ligjit të ri federal dhe kantonet kanë mjete në dispozicion – si blerjet testuese dhe sanksionet (…) Duke ndaluar, ne po zhvendosim problemet diku tjetër.”

Zgjidhje për problemin ekologjik?

Cigaret elektronike të vogla paraqesin gjithashtu një problem të madh mjedisor për shkak të natyrës së tyre njëpërdorimshe. Bateritë që përmbajnë shpesh hidhen në plehra të zakonshme.

“Mund të flas vetëm për Philip Morris: sa i përket produkteve tona, konsumatorët e rritur kanë mundësinë t’i kthejnë ato në qese speciale përmes postës. I vendosin në kuti, dhe më pas trajtohen nga partneri, Fondacioni SENS, që të bëhet riciklimi.”

Julian Pidoux thotë se kjo zgjidhje po adoptohet gjithnjë e më shumë nga klientët e produkteve të multinacionales amerikane.

 

---