Bertila pranohet në doktoraturë pa Master në një nga universitetet më të mira të Amerikës

Studentja shqiptare fiton çmim shkencor dhe doktoraturë pa Master

Bertila Bruka, studente shqiptare nga Kukësi, ka arritur një sukses të jashtëzakonshëm në fushën akademike. Ajo është shpallur fituese e çmimit “Kërkues shkencor i shkëlqyer” nga Stevens Institute of Technology dhe është pranuar direkt në programin e doktoraturës në Georgia Institute of Technology, pa qenë e nevojshme diploma Master – një privilegj që u ofrohet vetëm studentëve me rezultate të jashtëzakonshme, transmeton albinfo.ch.

Bertila u diplomua këtë vit për Inxhinieri Biomjekësore me medaljonin “High Honors”, duke u dalluar për punën kërkimore dhe udhëheqjen në projekte shkencore. Ajo ka prezantuar studimet e saj në konferenca prestigjioze në SHBA dhe ka zhvilluar kërkime në universitete të mëdha si Yale dhe National Institutes of Health (NIH).

Rrugëtimi i saj përfshin fitimin e bursës shumë prestigjioze të Jack Kent Cooke Foundation dhe përzgjedhjen si STEM Leader në programe shtetërore të SHBA. Me punën e saj në projekte për neuroshkencën, nanoteknologjinë dhe inxhinierinë biomjekësore, Bertila ka treguar aftësi inovative dhe lidership të rrallë.

Suksesi i saj është një shembull frymëzues për të gjitha vajzat shqiptare, duke dëshmuar se përkushtimi, dijet dhe këmbëngulja mund të hapin dyert e universiteteve më prestigjioze të botës. /Albinfo.ch

---