Shqipëria magjeps me numrin e turistëve: 6.6 milionë vizitorë deri në korrik

Shqipëria po tërheq gjithnjë e më shumë vëmendjen e botës si një destinacion turistik. Vetëm deri në korrik të këtij viti, vendin e kanë vizituar rreth 6.6 milionë turistë, shifër që përfaqëson një rritje prej 4% krahasuar me të njëjtën periudhë të vitit të kaluar.

Shumica dërrmuese e vizitorëve, mbi 6.2 milionë, vijnë nga vendet evropiane, ndërsa një numër gjithnjë e më i madh turistësh mbërrijnë nga SHBA-ja, Azia Lindore dhe Afrika.

“Kemi vërejtur rritje të dukshme të turistëve nga e gjithë Evropa, por edhe nga Kanadaja. Krahasuar me vitin e kaluar, prenotimet janë shtuar ndjeshëm dhe sezoni turistik po zgjatet. Ajo që i tërheq turistët është mikpritja shqiptare, çmimet e arsyeshme dhe bukuritë natyrore të vendit tonë,” shprehet Albulen Ndrepepaj, menaxhere resorti, për A2 CNN, transmeton albinfo.ch.

Mes turistëve që po zbulojnë Shqipërinë këtë verë janë edhe të rinjtë nga Finlanda. Venla, e cila viziton vendin për herë të parë, tregon përshtypjet e saj:

“Jam shumë e befasuar. Plazhet janë fantastike, ushqimi i shkëlqyer dhe njerëzit tepër miqësorë.”