Elina Duni, me “Dallëndyshe” në kështjellën e Thunit

Elina vlerësohet si një ndër zërat më emocionues në skenën evropiane të xhhazit", thuhet në informatën që plason organizatori në prag të koncertit

Nga 5 deri më 21 qershor, në kulisat e kështjellës impozante të qytetit Thun të Bernës mbahet seria tradicionale e koncerteve verore. Në këtë festë të muzikës, do të jetë e pranishme edhe këngëtarja e njohur shqiptare e xhazit, Elina Duni. Ajo me grupin e saj do të ketë një koncert të shtunën, më 13 qershor, me fillim në orën 21.00.

“Vizitorët e koncertit do t`i presë një kombinim i mrekullueshëm në mes të muzikës popullore të Ballkanit dhe xhazit modern. Elina Duni vlerësohet si një ndër zërat më emocionues në skenën evropiane të xhhazit”, shkruhet veç tjerash në informatën që plason organizatori në prag të koncertit dhe e transmeton albinfo.ch.

“E nxitur nga pianisti Colin Vallon, ajo kishte filluar të merrej me anën muzikore të rrënjëve të saj shqiptare. Me kuartetin e saj ajo lidh muzikën popullore të Ballkanit në një mënyrë të mrekullueshme, të veten, me xhazin modern dhe zhvillon kështu një tingull jashtëzakonisht të fuqishëm dhe emocionues. Në mbrëmjen e 13 qershorit ajo do të na prezantohet me albumin e saj “Dallëndyshe”, përfundon njoftimi.