Kosovarja fsheh pasurinë prej 350,000 frangash për të marrë ulje të primeve

Një grua 74-vjeçare është gjobitur për mashtrime të shumëfishta. Gruaja kishte marrë fonde nga Kantoni i Aargaut për të cilat nuk kishte të drejtë

Në vitet 2013 dhe 2014, një çift i martuar nga Kosova që jetonin në Aargau nuk kishin përfshirë një listë të letrave me vlerë me deklaratën e tyre tatimore, transmeton albinfo.ch. Kështu, ata nuk deklaruan pasuri me vlerë prej 349,000 frangave zvicerane. Në korrik të vitit 2013, gruaja u dënua për evazion fiskal. Burri ka vdekur ndërkohë.

Një urdhër penal për mashtrime të shumëfishta ndaj kosovares tani është bërë i formës së prerë, shkruan gazeta Aargauer Zeitung. Çifti kishte aplikuar për ulje të primeve për vitin 2016 bazuar në vlerësimin e pavërtetë tatimor.

Kështu, SVA Aargau i kishte dhënë gruas 61.80 CHF në muaj, për një total vjetor prej 741.60 CHF. E njëjta gjë ndodhi edhe vitin pasardhës: Falë deklaratës së rreme tatimore nga viti 2014, kosovarja tani 74-vjeçarkishte marrë një ulje të primit mujor prej 70.65 CHF për vitin 2017 (gjithsej 874.80 CHF).

Zyra e prokurorit publik ka vendosur një gjobë me kusht prej 60 tarifash ditore prej 30 CHF dhe një gjobë prej 400 CHF, për gruan, përcjell albinfo.ch. Përveç kësaj, vjen edhe tarifa ndëshkuese prej 900 CHF.

---