Xhaka drejt Milanit, a po e sheh Leverkuseni si zëvendësues të tij Ardon Jasharin?

(KEYSTONE/Jean-Christophe Bott)

E ardhmja e Granit Xhakës te Bayer Leverkusen po hyn në një fazë vendimtare, ndërsa AC Milan intensifikon përpjekjet për ta transferuar kapitenin e Zvicrës në “San Siro”. Në sfond të kësaj lëvizjeje të madhe, ka nisur të përflitet gjithnjë e më shumë për një tjetër emër të futbollit zviceran, Ardon Jasharin, shkruan Blick, transmeton albinfo.ch.

22-vjeçari i Luzernit është në radarët e Milanit prej kohësh dhe ditët e fundit kuqezinjtë kanë zhvilluar kontakte konkrete për ta bindur të transferohet në Serie A. Megjithatë, kërkesa e lartë financiare e Club Brugge  që kontrollon të drejtat e tij  prej 35 milionë eurosh, ka frenuar çdo përparim të menjëhershëm në bisedime.

Në këtë situatë, skenari i një shkëmbimi indirekt mes dy klubeve bëhet gjithnjë e më realist: nëse Xhaka largohet drejt Milanit, Bayer Leverkusen do të kishte arsye të forta për të zëvendësuar liderin e mesfushës me një profil të ri, të talentuar dhe premtues si Jashari. Sidomos tani që klubi gjerman disponon një buxhet të fuqishëm pas shitjes rekord të Florian Wirtz te Liverpooli për 140 milionë euro, transmeton albinfo.ch.

Drejtori sportiv i Leverkusenit, Simon Rolfes, duke komentuar për “Sport-Bild” në lidhje me mundësinë e largimit të Xhakës, tha: “Nuk jemi të detyruar ta bëjmë këtë. Do ta linim dikë tjetër vetëm nëse do të kishte kuptim për ne  në mënyrë që ta plotësonim më tej ekipin në përputhje me rrethanat”.

Këto fjalë ngrenë pikërisht mundësinë që “zëvendësimi me kuptim” i Xhakës të jetë pikërisht Jashari – një lojtar me cilësi organizative, i rritur në sistemin zviceran, dhe me perspektivë afatgjatë.

Nëse kjo manovër realizohet, Milan do të fitonte një lider të gatshëm si Xhaka, ndërsa Leverkusen do të përfitonte një investim të ri për të ardhmen në mesfushë. Por një gjë duket gjithnjë e më e qartë: nuk ka gjasa që të dy, Xhaka dhe Jashari, të përfundojnë te Milani  marrëveshja është thjesht shumë e kushtueshme për t’u përballuar në një merkato të vetme, transmeton albinfo.ch.