Kosova

Presidentja Osmani në Gjenevë: “Pa mërgatën, Kosova nuk do të ishte as e lirë, as e pavarur”

Ngjarja u organizua në Qendrën kulturore në Vernier dhe u karakterizua nga emocione, simbolikë kombëtare dhe një fjalim i fuqishëm nga presidentja

E premte, 23 Maj 2025 - 18:20 Zamira Bytyqi, Gjenevë

Më 22 maj 2025, presidentja e Republikës së Kosovës, Vjosa Osmani, zhvilloi një vizitë zyrtare në Gjenevë, në kuadër të takimeve me bashkatdhetarët dhe përfaqësues institucionalë të Zvicrër. Pas pritjes së saj zyrtare në Bernë nga presidentja e Konfederatës Zvicerane, vizita e Gjenevës mori karakterin e një tubimi popullor me pjesëmarrje masive nga mërgata shqiptare, shkruan albinfo.ch.

Ngjarja u organizua në sallën e madhe të qendrës kulturore në Vernier dhe u karakterizua nga emocione, simbolikë kombëtare, valle tradicionale dhe një fjalim i fuqishëm nga presidentja, e cila vlerësoi kontributin e jashtëzakonshëm të mërgatës për lirinë, shtetëformimin dhe zhvillimin e Kosovës.

“Pa mërgatën, Kosova nuk do të ishte as e lirë, as e pavarur, as sovrane, as e zhvilluar, as demokratike”, theksoi znj. Osmani, duke vënë në pah rolin jetik të diasporës shqiptare në Zvicër, nga vitet ’60 e deri më sot.

Ajo falënderoi posaçërisht organizatorët e takimit, z. Ramadan Rrahmani dhe z. Nasuf Nuhiu, si dhe shprehu mirënjohje për gratë e pranishme, të cilat i cilësoi si shtylla të familjes dhe shoqërisë, dhe si kontribuuese në vijë të parë të luftës dhe ndërtimit të shtetit.

“Shteti zviceran u bë streha dhe mburoja për vajzat dhe djemtë tanë, dhe tani përfaqësuesit tanë janë epitoma e suksesit: sportistët që na nderojnë në gjithë botën, mjekë, inxhinierë, politikanë, shkencëtarë…”, deklaroi Osmani, duke nënvizuar bashkëjetesën e frytshme të shqiptarëve me shoqërinë zvicerane.

Atmosfera në sallë ishte festive dhe krenare. Fëmijë të veshur me kostume tradicionale, valle popullore, flamuj kuq e zi dhe simbole të dy shteteve u bënë pjesë e mozaikut të një ngjarjeje që la mbresa të thella.

Vizita e presidentes Osmani në Zvicër u përshkua nga vlerësime të larta institucionale dhe emocione të sinqerta nga diaspora, duke konfirmuar edhe një herë lidhjen e pandashme mes shtetit të Kosovës dhe qytetarëve të saj jashtë vendit.