Swiss nuk fluturon më mbi Pakistan

(KEYSTONE/Christian Merz)

Një fluturim i linjës ajrore zvicerane Swiss nga Delhi për në Cyrih u devijua të enjten në mbrëmje për shkak të tensioneve të shtuara midis Indisë dhe Pakistanit, duke shmangur hapësirën ajrore pakistaneze, shkruan 20minuten, transmeton albinfo.ch.

Sipas të dhënave nga Flightradar24, fluturimi i nisur nga Zvicra drejt Indisë u operua normalisht, por kthimi mori një rrugë jugore, duke evituar hapësirën ajrore të Pakistanit. Po ashtu, edhe fluturimi i së premtes në mëngjes ndoqi të njëjtën rrugë alternative.

Qeveria pakistaneze, vetëm dy ditë më parë, paralajmëroi për një sulm të mundshëm nga India brenda 24–36 orëve, duke rritur ndjeshëm shqetësimet për sigurinë në rajon, transmeton albinfo.ch.

Në një deklaratë për gazetat Tamedia, zëdhënësja e Swiss tha se masa mbetet në fuqi “deri në njoftim të mëtejshëm”. Ajo theksoi se rrugët e devijuara ndikojnë në kohëzgjatjen e fluturimeve për në Azi, veçanërisht ato për në Singapor dhe Bangkok, megjithëse vonesat janë minimale.

Linjat ajrore ndërkombëtare kanë reaguar ndryshe ndaj situatës: ndërsa Turkish Airlines, Singapore Airlines dhe KLM kanë vijuar fluturimet përmes Pakistanit, Air Canada, United Airlines dhe American Airlines kanë zgjedhur rrugë veriore. Air India, ndërkohë, ka disa ditë që e ka shmangur tërësisht hapësirën ajrore pakistaneze, duke fluturuar gjithashtu në jug të vendit.

“Na vjen keq për shqetësimet që kanë rezultuar nga vonesat,” deklaroi Swiss, duke i këshilluar pasagjerët të kontrollojnë statusin e fluturimeve përmes aplikacionit apo faqes zyrtare. “Siguria është përparësia më e lartë për të gjitha linjat ajrore në Grupin Lufthansa, përfshirë Swiss,” u tha më tej në deklaratë, transmeton albinfo.ch.