Kosovë: Shënohet Dita Memoriale e të Mbijetuarve të Dhunës Seksuale gjatë Luftës, një burrë flet publikisht

Albulena Haxhiu, FB

Sot, më 14 prill 2025, në Kosovë shënohet Dita Memoriale e të Mbijetuarve të Dhunës Seksuale gjatë Luftës së fundit, një ditë që i kushtohet përkujtimit të vuajtjeve dhe traumës së atyre që kanë përjetuar këtë formë të dhune. Kjo ditë synon të nderojë të mbijetuarit, të rrisë ndërgjegjësimin për padrejtësinë e përjetuar dhe të luftojë stigmën e shoqërisë ndaj tyre, shkruan albinfo.ch.

Në kuadër të aktiviteteve të organizuara nga Qendra Kosovare për Rehabilitimin e të Mbijetuarve të Torturës (QKRTM), për herë të parë një burrë i mbijetuar i dhunës seksuale gjatë luftës do të ndajë publikisht rrëfimin e tij, një akt guximi që sfidon heshtjen dhe frikën, dhe që synon të hapë një kapitull të ri për drejtësinë dhe të vërtetën.

Kjo ditë është zyrtarizuar si ditë përkujtimore me propozimin e Presidentes Vjosa Osmani, si një përpjekje për ruajtjen e memories kolektive dhe për të shprehur solidaritetin me të mbijetuarit e dhunës seksuale, shkruan albinfo.ch.