Gjermania shqyrton mundësinë e tërheqjes së rezervave të arit nga SHBA

(KEYSTONE/Martin Ruetschi)

Gjermania po shqyrton mundësinë e rikthimit të rezervave të saj të arit nga Shtetet e Bashkuara, për shkak të shqetësimeve mbi politikat e paparashikueshme të presidentit aktual, Donald Trump.

Për dekada me radhë, Gjermania ka mbajtur rreth 1.200 ton ar – afërsisht 30 për qind të rezervave të saj totale – në kasafortat e Rezervës Federale në New York. Megjithatë, kjo praktikë po vihet gjithnjë e më shumë në pikëpyetje.

Aktualisht, vlera e këtyre rezervave kap shifrën e 113 miliardë eurove. Stoqet janë mbajtur jashtë vendit kryesisht për të siguruar qasje të shpejtë në dollarë amerikanë në rast krizash financiare. Megjithatë, disa zyrtarë të lartë të Unionit Demokristian (CDU) kanë shprehur dyshime mbi këtë strategji dhe po kërkojnë rishikimin e saj, transmeton albinfo.ch.

“Po, kjo çështje është rihapur,” tha Marco Wanderwitz, ish-ministër dhe anëtar i CDU-së, i cili prej vitesh ka kërkuar inspektime të rregullta apo rikthimin e arit në Gjermani. Markus Ferber, një tjetër anëtar i CDU-së në Parlamentin Evropian, mbështeti këtë thirrje, duke theksuar se zyrtarët e Bundesbank duhet të inspektojnë fizikisht rezervat dhe të dokumentojnë gjendjen e tyre.

Gjermania zotëron rezervat e dyta më të mëdha të arit në botë, të grumbulluara kryesisht pas Luftës së Dytë Botërore si pjesë e sistemit monetar të Bretton Woods.