Gjermani: Racizmi përditshmëri, jo përjashtim

Foto Twitter: @NationalIndNews

Një studim i fundit nga Qendra Gjermane për Kërkimin e Integrimit dhe Migracionit ka nxjerrë në pah përhapjen e diskriminimit ndaj individëve që perceptohen si migrantë ose myslimanë në Gjermani, veçanërisht ndaj grave myslimane dhe personave me ngjyrë. Raporti, që bazohet në një anketë me 10,000 pjesëmarrës, tregon se më shumë se gjysma e atyre që duken ndryshe përjetojnë diskriminim të përditshëm, përfshirë Fatmën dhe Hannën, të cilat përjetojnë diskriminim për shkak të shamisë së kokës dhe ngjyrës së flokëve.

“Shofërët e tjerë më kushtojnë vëmendje. Mësuesja në qendrën e trajnimit të edukatorëve më tha se shamia e kokës nuk është higjienike. Kjo më dëshpëron. Kjo lë gjurmë tek unë”, tha Fatma për DW.

Ndërkohë, Hanna, që po ashtu jeton në Berlin, i tha gazetës gjermane se nuk guxon të shkojë në lagje të caktuara. “Unë nuk guxoj të shkoj në lagje të caktuara. Njerëzit më thonë se duhet të kthehem në vendin tim”, u shpreh ajo.

Ky diskriminim ka pasoja të mëdha psikologjike, duke çuar në ankth dhe depresion, shkruan DW.

Sipas studiuesve, racizmi në Gjermani po bëhet gjithnjë e më i fshehur dhe përshtatet me normat sociale. Diskriminimi është shpesh i përhapur në shoqëri, dhe shumë nga ata që përjetojnë këtë trajtim ende nuk gëzojnë të drejtat e plota politike. Në raportin e botuar, më shumë se 60% e grave myslimane dhe personave me ngjyrë kanë përjetuar diskriminim të rregullt, ndërsa shumë njerëz me qëndrime raciste janë ende të pranishëm në shoqërinë gjermane.

Studimi kritikon ligjet ekzistuese për mbrojtjen e individëve nga diskriminimi, duke i cilësuar ato si të dobëta. Ferda Ataman, e Ngarkuara Federale Kundër Diskriminimit, ka kërkuar nga qeveria e ardhshme që të përmirësojë mbrojtjen ligjore për ata që përjetojnë diskriminim, duke theksuar se është e nevojshme të ndryshohen politikat për të luftuar më efikas racizmin në Gjermani, përcjell albinfo.ch.