Eksportet gjermane të makinave rriten, pavarësisht kërcënimeve të Trump për tarifa të reja

(KEYSTONE/DPA/Julian Stratenschulte)

Eksportet e makinave nga Gjermania u rritën në vitin 2024, edhe pse Shtetet e Bashkuara kërcënojnë me tarifa të larta doganore.

Sipas të dhënave nga Zyra Federale e Statistikave, Gjermania eksportoi rreth 3.4 milionë makina të reja në mbarë botën, me vlerë 135 miliardë euro. Eksportet u rritën me 2.5% në sasi, megjithëse vlera e tyre ra lehtë me 1.3%.

SHBA-ja ishte tregu më i madh për makinat gjermane, duke përbërë 13.1% të eksporteve, ndjekur nga Britania me 11.3% dhe Franca me 7.4%.

Ndërkohë, importet e makinave në Gjermani ranë me 11.5% në volum dhe 12.8% në vlerë, duke zbritur në 1.8 milion njësi, përcjell albinfo.ch.

Këto shifra vijnë në një moment kur Presidenti Donald Trump ka kërcënuar me vendosjen e një tarife prej 25% për makinat e importuara nga Bashkimi Evropian — një rritje e ndjeshme nga tarifa aktuale prej 2.5%.

Nëse këto tarifa hyjnë në fuqi, ato do të godasin fort industrinë evropiane të automobilave, veçanërisht prodhuesit gjermanë, për të cilët tregu amerikan mbetet jetik. Pothuajse një në tre Porsche dhe një në gjashtë BMW janë shitur në Amerikën e Veriut gjatë vitit 2024, ndërsa Volkswagen, Audi dhe Mercedes-Benz kanë raportuar një pjesë të shitjeve në këtë treg nga 12% deri në 15%.