Një yll në ngritje: Fiona, sopranoja e verbër, me zë brilant

Fiona Llapashtica, një model frymëzues për shumë të rinj e të reja që aspirojnë të ndjekin ëndrrën dhe karrierën artistike

Fiona është një vajzë e thjeshtë, e çiltër, pozitive dhe shumë e dashur për të gjithë. Ajo shquhet për zërin e saj të fuqishëm, madje u komentua edhe për intonacionin dhe ngjyrat e saj të zërit kumbues.

Ajo zotëron energji pozitive, optimizëm dhe shumë vetëbesim. Ajo jeton në Vjenë dhe përveç gjuhës gjermane, e flet bukur dhe rrjedhshëm edhe gjuhën shqipe.

Fiona interpreton këngë të zhanrit pop-jazz.  Ajo ka realizuar disa paraqitje në Vjenë dhe së fundmi ka bërë shumë “zhurmë” edhe në Kosovë, duke marrë pjesë në “International Opera Festival” në Prishtinë.

Vjena, qytet i kulturës dhe i artit

Fiona ka lindur dhe është rritur në Vjenë. Dashuria që ajo ka për Austrinë është e madhe, pasi aty po kalon vitet më të mira të jetës së saj.

Rrjedh nga një familje artistësh shqiptarë. Prindërit e saj janë me prejardhje nga Prishtina. Në fakt, babai i saj është Agimi, një muzikant i njohur i skenës shqiptare në Kosovë dhe Austri.

Fiona ka përfunduar shkollën fillore dhe të mesme në Institutin e të Verbërve në Vjenë, më pas ka përfunduar shkollimin për dy vjet në Schubert Konservatorium.

Si e vogël kishte tipare të zërit kumbues dhe me kalimin e kohës ajo zgjodhi të zhvillojë tutje këtë dhunti.

Duke e parë talentin e saj, prindërit e mbështetën Fionën, duke e dërguar në disa shkolla të muzikës për ta zhvilluar si artiste.

Ndërkohë sa i përket jetës dhe shoqërisë në Austri, Fiona thotë për Albinfo.at se “sistemi social në Austri është shumë i mirë, çdo njeri e ka mundësinë e zhvillimit të tij si personalitet, mundësi shkollimi dhe në përgjithësi e vlerësoj hapësirën që i jepet gjithsecilit për të arritur aty ku do”.

Prishtina, vendi ku Fiona dhuroi një paraqitje dinjitoze

Prishtina është qytet shumë i dashur për Fionën dhe njëkohësisht është vendlindja e prindërve të saj.

Vera për të ishte shumë produktive, pasi kësaj here ajo ishte pjesë e Masterclass-it, të artistit me renome botërore, Ramë Lahaj, duke dëshmuar potencialin e saj të një artisteje të vërtetë.

Ajo e përshkruan pjesëmarrjen në “International Opera Festival” (Festivalit Ndërkombëtar të Operës) si një nga përvojat më të mira në rrugëtimin e saj artistik dhe njëkohësisht edhe më emocionues.

“Pa dyshim që koncerti në Prishtinë “International Opera Festival” ishte për mua më i miri dhe njëkohësisht më emocionues. Ka qenë koncert shumë i mirë, eksperiencë e mirë dhe njerëzit kanë qenë shumë të ngrohtë. Kur jam në skenë, jam shumë e emocionuar, sepse njerëzit kanë ardhur të më shohin dhe të më dëgjojnë mua dhe kur filloj të këndoj, krijohet një atmosferë shumë e bukur”.

Fiona ka treguar ekskluzivisht për revistën Albinfo.at se është ftuar sërish të jetë pjesë e Masterclass-it për vitin 2025.

Nga muaji shtator Fiona Llapashtica ka filluar studimet për Opera në Shkollën e Muzikës Klasike në Vjenë. Po ashtu, ajo do të jetë pjesë e disa koncerteve edhe në Vjenë, të programuara nga vetë shkolla.

---