Kancelari gjerman në telefon me Putinin, i kërkon t’i tërheqë trupat nga Ukraina

(KEYSTONE/DPA/Christoph Soeder)

Kancelari i Gjermanisë, Olaf Scholz, ka zhvilluar sot një bisedë telefonike me presidentin e Rusisë, Vladimir Putin.

Sipas njoftimit nga Qeveria e Gjermanisë, Scholz e dënoi luftën në Ukrainë, teksa u theksua se kjo ishte biseda e parë telefonike mes tyre në dy vjetët e fundit.

Zëdhënësi i qeverisë, Steffen Hebestreit, ka thënë se Scholzi e dënoi “luftën agresore të Rusisë” kundër Ukrainës, gjatë bisedës së tyre telefonike, dhe i kërkoi Putinit t’i japë fund asaj, duke i tërhequr trupat ruse që e pushtuan vendin fqinj në shkurt të vitit 2022, transmeton albinfo.ch.

“Kancelari i bëri thirrje Rusisë të tregojë gatishmëri për të negociuar me Ukrainën, me qëllim të arritjes së një paqeje të drejtë dhe afatgjate. Ai e theksoi vendosmërinë e palëkundur të Gjermanisë për ta mbështetur Ukrainën në luftën e saj kundër agresionit rus sa të jetë e nevojshme”, tha Hebesreit.

Hebesreit ka bërë të ditur se Scholz kishte biseduar paraprakisht me presidentin e Ukrainës, Volodymyr Zelensky, dhe pastaj i kishte telefonuar Putinit. Lideri gjerman i dënoi sulmet ajrore ruse ndaj infrastrukturës civile në Ukrainë dhe paralajmëroi se dërgimi i trupave koreanoveriore në Rusi për të luftuar në luftë kundër Ukrainës, shënon përshkallëzim serioz të konfliktit.

Sipas raportimeve nga DPA, biseda mes Scholzit dhe Putinit ka zgjatur një orë.